Shillong, May 11: Special Force (SF-10)-ni sipairangko sak 1,387-oni sak 905-ona komiatpilna bi•aniko Mongolbar salo Meghalaya Cabinet ra•chakangaha.
Meghalaya a•dokni Home Minister Lahkmen Rymbui-ni parakatani gitade, SF-10 sipairangko nambate nirok sandina aro nambate jakkalna man•na gita sorkari, SF-10 sipai dolko taridapna gita nangnikaha.
Sak 905 sipairangde SF-10 dolo donggen aro gipinrangkode obostani kri dingtang dingtang a•jarango ba outpost-rango jakkalskana man•gen ineba Home Minister parakataha.
Sipairangko nambate jakkalna man•na gita SF-10 dolko taridapna nangaha ineba Rymbui parakataha.
Meghalaya a•doko bobil dake chakatgipa dolrangko warachakna miksonganiosa SF-10 sipai dolko bikotahachim indiba da•o a•doko bobil dake chakatgipa dolrang komiangahani gimin SF-10-ni sipairangko komiatna gita Home department, Cabinet-ona ra•angahachim ine nikna man•a.
Home Minister-ni parakatani gitade, SF-10-o dongkuenggipa sak 905 sipairangoni, sak 183-kode SF-10 headquarter-o dongen, sak 361-kode 1st MLP Battalion Mawiong-o kulina sienggipa eastern range tactical base-o dongen aro sak 361-kode 2nd MLP Battalion-o kulina sienggipa western range tactical base-o donskagen.
