Baghmara, Jan 19: Meghalaya Legislative Assembly-ni Women Empowerment Committee, salgnina South Garo Hills-ko wenanga.
Indake Baghmara District Resource Centre-o dingtangdingtang department-rang baksa tom.aniko ong.ate da.ororo ong.enggipa me.chikrangni bidingo aro minggipin kamrangni gimin chanchirimaniko dakangaha.
Tom.anio Committee-ni Chairperson Dr.Ampareen Lyngdoh baksa Mawsynram-ni MLA, HM Sangpliang, Ampati MLA, Miami D Shira, Rongara-Siju MLA, Rakkam A.Sangma,Chokpot MLA, Lazarus M.Sangma aro Nongpoh MLA, Mayralborn Syiem bang.a dingtangdingtang me.chikrangni ong.anggimin mamlarang aro MGNREGS-ni ning.o jakkalenggipa job card-rang, South Garo Hills-o MHIS-ko ra.gatani bidingo aro ma.giparang bi.sa atchiani somoio sianggiparangni bidingo nipiltaianiko dakangaha.
Ia tom.e chanchirimanio re.anggipa December 7 tariko Baghmara Civil Hospital-o dambe me.chikma saksa Namchi Ch.Marak-ni gimin janapengon, Committee uni report ba koborko segate ra.angaha.
Unbaksana cha.ani chu.ongjae sianggiparang, me.chikrang aro me.chik bi.sarangni kosako ong.gija dakanirang aro noko doka satanirangni bidingo Committee gisiko nangbee chanchirimaniko dakenba segate ra.angaha.
Committee on Empowerment of Women, skanggipa salo Siju-ona re.ange Forest and Environment, PWD,Fisheries, Tourism department-ni dal.batgipa Officer-rang, BDO-rang aro Baghmara DRDA-Project Director-ko grongeaha.
Indake gnigipa salo Baghmara-ni Food and Civil Supplies,DM and HO, DIG Western Range,SP, EE PHE,Social Welfare,DCPO,DPO,ICDS, ICPS, Labour Department, Employment and Craftsmanship-ko gronge a.jao neng.nikaniko chagrongenggipa me.chikma dolrang aro dingtangdingtang nangchongmotgipa issue-rangni giminba Committee gisiko nangbee note ka.angaha.
