Shillong, Jan 5: Shillong Chamber Choir-ni dilgipa Neil Nongkynrih, Budbar attamo Mumbai songjinmani hospital-o a•gilsakko watangaha. Ua bilsi 51 ong•ahachim.
Da•o dipet uni siani a•selko tale ma•sikujaengoba uni okningo pari bretani a•sel ua siaha ine kobor on•timgiparang parakataha.
Okningo saanirangko man•ahani gimin Nongkynrih-ko re•anggipa 2021 bilsini Novembet ja dipetan Mumbai songjinmao done sanengachim ineba kobor on•timgiparang u•iataha.
Sianggipa Neil Nongkynrih-na 2015 bilsio a•songo mingnambatsranggipa upatti Padma Shri-ko on•aha aro una skangba uni doka dam•anichi on•gilanirangna U Tirot Sing award aro uandakgipa gipin upattirangkoba una on•ahachim.
United Kingdom a•songoni re•bapilani ja•man 2001 bilsio ua Shillong Chamber Choir-ko bikotchengahachim aro uandaken 2010 bilsio ‘India’s Got Talent’-koba ua Shillong Chamber Choir-na chedile on•aha.
2017 bilsioni uni siangona kingkingan ua Central Board of Film Certification-ni membor-ba ong•angaha.
Uni dilanichi Shillong Chamber Choir, 2010 bilsini July jao China a•songni Shaoxing-o ong•atanggipa World Choir Games-oba bakko ra•angaha aro ia susaanio uamang minggittam gadangrango Gold-ko man•baaha.
