Shillong, March 16: Shillong-o Punjabi-rangni tom·dake chasongrangna dongbaenggipa gittim ba Harijan Colony-ni manderangko gipin biapchi apjitatani bidingo adita meligrikgijanirangchi matchotjaenggipa mamlani gimin Urban Development Minister Pa Sniawbhalang Dhar, Harijan colony-ni manderang baksa agan-golpogrikna gita bon·kame okamtaianiko dakenba uamangni aganani ba chanchianirangko knae ra·anggen ine aganenba, iani ja·man mikkangchi maiko dako namgen ba namjawa iani gimin tik ka·anggen ine Bristibar salo aganangaha.
Ia mamlani bidingo dolgni apsan asonge chanchirimna gita Mongolbar salo Harijan colony-ni manderangko okamahachim, indiba uamangoni darangba tom·aona re·batokjahani gimin chanchirimaniko changgipinona dontongataha ine nikna gita man·gen.
Harijan colony ba Sweeper’s colony-ni manderangko biap gipinchina apjitatani mamla ong·kataniara, batanggimin 2018 bilsio gittimni manderang aro bus driverni gisepgriko jegrikanichi a·bachengahachim.
