Shillong, Nov 25: Bristibar salo, Cherry Blossom Festival-ko Meghalaya a•dokni Chief Minister Conrad K Sangma baksana India a•songona Japan-ni Ambassador Satoshi Suzuki, Shillong songjinmani Wards Lake-o a•bachengate on•angaha. Ia Cherry Blossom Festival-ko a•bachengatani somoio ia festival ba maniani bak ong•enggipa Shillong Literary Festival-ni a•bachengate on•angjolaha.
Ia Cherry Blossom Festival-ko a•bachengate on•anganio a•dokni Chief Minister Conrad K Sangma, jinmana aganprakangengon, ia bilsioba changsataie ia festival ba manianiko ong•attaina man•ahani gimin an•tangni kusi ong•aniko parakangenba, a•doko Music, Art aro Culture-ko ra•dona ja•ku de•ani bak gita ia manianiko bilsiantian dal•bate ong•atna sorkari jotton ka•enga ine parakangaha.
Salgro salaram a•dokrangara changa sapanirang gapgipa biap ong•ani gimin ian chadamberangni u•i-ma•siani aro changa sapanirangko skie ra•grikna aro sualgrikna gita cholko on•ani gita ong•enga ineba Chief Minister aganaha.
Meghalaya a•dokni bilsi 50 gapaniko manianio dingtang dingtang program-rangko ong•atna siengani gimin ian chadamberangna an•tangtangni changa sapanirangko mesokna chol ong•gen ineba Sangma aganaha.
Meghalaya a•doko dokna dam•na changgipa manderangna an•tangtangni changa sapanirangko mesoknasan ong•aigija doka dam•aniko an•tangtangni janggi tangani chol dake ra•na man•na gita sorkari, da•o adita jarangni gisepon skanggipa changna a•dokni musician-rang ba dokgipa dam•giparang baksa gronggrikaniko ong•atna sienga ineba ia tom•anio Chief Minister parakataha. Jakni kamrangko changgipa sapgipa chadamberangna uamangni changa sapanirangchi janggi tangani cholrangko on•na gita sorkari, iandakgipa manderangoniko bading chiwalgiparang ong•atna sorkari miksongenga ineba Chief Minister parakataha.
Skanggipa changna Shillong Literary Festival-koba ong•atengani gimin ian a•dokni sea jotanio gisik nanggipa manderangna, a•songo mingsing minggamgipa manderangna baksa agangrikna cholko on•ani gita ong•gen ineba Sangma aganaha.
Meghalaya a•dokna pilak nanga dakchakanirangko on•engani gimin ua dingtangmancha Japan sorkarikoba mittelpilangaha.
Ia tom•anio India a•songona Japan-ni Ambassador Satoshi Suzuki-ba jinmana aganprakengon, ia Cherry Blossom Festival-ko ong•ataniara India a•songo songdongenggipa manderangni giseposan ong•aigija Japan aro India a•song damgnio songdongenggipa manderangni gisepo meli-nangrimgrikaniko ra•bana dakchakani ong•gen ine parakangaha.
Ia tom•anio dongpae bakko ra•anggipa gipin manderangara, Meghalaya a•dokni Chief Secretary Rebecca Suchiang, NEC-ni Secretary K Moses Chalai, Tourism-ni Commissioner & Secretary Dr Vijay Kumar, a•dokni PCCF B K Lyngwa aro gipinrang ong•a.
