Shillong, Aug 3: Shillong songjinmao jabol galchakani mongsonggipa biap Marten-ko Seng Samla Mawlai Pyllun (SSMP) chipe donatani ja•man Meghalaya a•dokni Urban Affairs Minister Sniawbhalang Dhar, SSMP-ni chadamberang baksa tom•e chanchirimangaha aro songjinmao jabol galchakani gital biapko sandina gita joint committee-ko songna tik ka•e donangaha. Ia committee-ko Shillong Municipal Board (SMB)-ni chief executive officer dilanggen.
Jabol galchakgipa biapko niena ku•rachakeba Urban Affairs Minister, ia biapko niechipjahani gimin SSMP-ni chadamberang, Marten-ni cholgugako chipe donatahachim aro uandaken ja•mano ua ia biapko re•ange nina draatako man•aha.
SSMP-ni general secretary Samran Syiem-ni parakatani gitade, iani bidingo bakan joint committee-ko songgnok aro jabol galchakani gital biapko sandignok.
Ia gital cholko ra•gatanichi Mawlai jolo songdongenggipa manderangsan ong•aigija a•dok gimikan namgniko man•china gita SSMP, sorkarina ku•pattianiko on•angaha ineba Syiem parakataha.
Indake ong•engon, jabol galchakani gital biapko ta•raken sandina gita uni department kamko ka•engaha ine a•dokni Urban Affairs Minister Sniawbhalang Dhar-ba parakataha.
