By Norahee Sangma

Ma∙mong sorkariko BJP-chi dilengon bang∙bata changon ba biaprangon golmal kajia ong∙anirang ko salsa batririk an∙ching niksona man∙enga.  Mande so∙otanirang, me∙chikrangni kosako ong∙gija dakanirang ba til∙ek an∙chaanirang, rim∙sruke ra∙anirang aro iandakgipa dingtang dingtang obostarangko an∙ching salantion koborangniko niksona ba knasona man∙enga.

BJP  dolrangni dal∙batgipa miksonganiara uan India a∙song gimikko Hindu pil∙atanin ong∙a. An∙ching koborrangoniko Kristianrangni kosako ong∙gija dakanirang, doka-satanirang, gilja nokrangko pe∙e galanirang aro so∙otanirangkoba niksoenga. Batanggimin jaoba Delhi songjinmao gilja nok te∙sako pe∙rurue galaniko an∙ching niksoaha. Apsan daken Muslimrangni kosakoba indake kragija dakanirangko an∙ching nikna man∙enga.

An∙ching a∙song ge•sa Democratic Country ong∙genchimoba da∙ororo angni nikanio gitade jakgitele an∙ching mamingko dakna man∙ja gita nika. Bang∙bata changon je mandeba sorkarini kosako matnange agananirangko dakgenchimode ba jegalanirangko  dakgenchimode ua mandeko uni kosako maikoba pa∙sike pattoko donatanirangko nikna man∙a. Unbaksana an∙chingni cha∙a ringanirangkoba uamangsa sason ka∙na a•bachengenga ine an•ching nikna man•enga. An∙chingni matchu be•en cha∙anirangkoba champenganirangko uamangan dakenga ine an•ching pilakan ma•sia. Da∙o Assam a∙dokoba Cattle Preservation Act ko ra∙gatenba, matchurangko dene palanirangko champengataniko dakenga. Assam a∙dokni Chief Minister ia niamko ra∙gatgenchimoba Megahalaya a∙dokna aro gipin salgro-salaram a∙doko matchu cha∙giparangna neng∙nikanirangko man∙jawa ine aganahaoba  baditana kingking kakketgipa ong∙gen uko darangba da∙o dipet agana man∙ja.

Meghalaya a∙dokoba BJP dolrang sorkari rikgenchmode apsandakgipa obostarangkon chagrongna nangnaba gnang uko darangba agansona man∙ja maina BJP  dolni miksonganiara namen namja aro anga chanchia uamangni miksonganiko pilakan ma∙sitoka ine. Na∙a indake namgijagipa dolrangko nang∙ni kosako sason ka∙na on∙na sikgenma? Adita salrangna skangsan an∙chingni Turani BJP MDC Pa Bernard Marakni  GHADC-ni EM Pa Dormonath Sangmani kosako kragija dake dokaniko aro gipin officer-rangko intek-saiaha ine news-o janapataniko niksoaha. Saksa dilgipa ong∙e indake dakaniara kraani ong∙ja. An∙tangko dilgipa ong∙na tariahaon na∙a pangnan sakgipinko knachakgipa aro chakchikrakgipa ong∙na nanga maina uasa kakketgipa dilgipa ong∙a.

Haida ia apsandakgipa obostarangkon an∙ching BJP-chi a∙dokko sason ka∙genchimode nikangkunaba gnang maina  an∙ching niatgenchimode je a∙dokoba BJP-chi sorkariko dilengachim iandakgipa  doka satanirangko bang∙en nikna man∙a aro  jakgitele dongna man∙gijarangan bang•bea.

Uni gimin hai an∙ching songdongenggipa sakantian BJP-ko an∙chingni a∙dokko sason ka∙na on∙jana aro a∙doko jakgitele dongna man∙na gita, aro an∙ching sakantian Kristianrang ong∙ani gimin Hindutva-ko jegale re∙baenggipa electionoba uamangni dolna an∙chingni gamchatbegipa vote-rangko batanggimin chango gitan puonanirangko dakjana ku∙mongatna ska.

(The views and comments expressed are purely of the author and Hub News is not responsible for them in any way)