Shillong, Jan 25: Adita salrangna skang, Shillong songjinmani Lumdiengjri aro Jaiaw jolrango kragija dake manderangko dokgiparangko police-rang rim·na sandiengaha ine Mongolbar salo a·dokni Home Minister Lahkmen Rymbui parakataha.
Home Minister-ni parakatani gitade, ia a·selrangni bidingo police-rang name am·sandienga aro dos dakgiparangko rim·na sandiengaha.
“Shillong songjinmani wilwilao iandake so·sojengjeng ong·atna jotton ka·enggipa manderangko police-rang bakan rim·na man·gen,” ine Rymbui aganaha.
Re·anggipa January 20 tariko Lumdiengjri jolo ma·sina man·gijagipa manderangni chadrapanichi komibeoba sakgittam manderang saknaanirangko man·na nangahachim.
Uni ja·man, Sombar attamoba, Jaiaw-ni Dinam Hall-o kam ka·enggipa manderangko sak 25-na batpile manderang jinma chadrapani a·sel kam ka·enggipa manderangoni sakbri saknaanirangko man·na nangahachim.
Indake ong·engon, Lumdiengjri-o ong·anggipa a·selni giminde mokordomako ka·aha indiba Jaiaw-o ong·gipa a·selni giminde police-rang mokordoma ka·na man·kujaenga ine Home Minister parakataha.
Mikkangchi iandakgipa obostarang ong·taijana gita police-rang, name am·sandienba kamrangko ka·enga ine janapatengon, police-rangni kamo bakrimaniko on·china gita ua jolo songdongenggipa manderangko didiataha.
Ia a·sel ong·aniranga maming jatni gita dinggrikani ong·ja ineba Rymbui parakataha.
