Shillong, April 23: A·jani Deputy Commissioner-ni bil on·ako man·ani ja·man, Hindu toromko chel·chakna re·mikkange kamko ka·enggipa, Rashtrya Swayamsevak Sangh (RSS) dolni sak 500-mang manderang a·dokni skotong Shillong songjinmao, Robibar salni bako re·jomanio bakko ra·angtokaha.
Re·jomaniko, Keating Road-ni Goenka Motors paksamsao donggipa Hindi Balika School-oni a·bachengchakate, Police Bazaar point gita, Bijou cinema hall, Dreamland, Sani Mandir point-rangko nappake, Boucher road, Military hospital, Rilbong Point, Jhalupara Point, Lower Mawprem taxi stand, Upper Mawprem, Barapathar point, Luckier road gita mikkangangenba Garikhana-ni Cantonment ground-o matchotateaha aro uamangni re·jomanggipa rama jolgimikon a·dokni chelchakgipa dolrangkoba donattokaha.
Iana skang, RSS dolni re·jomaniko ong·atengon, niam aro ge·etanirangko pe·ani aro dingtangg dingtang jatrangni gisepo kajia-golmalrangko ong·atgnigipa kamrangchi darang jat ba toromni kosako maming ding·chaoatanirangchi chrik-a·bokaniko dakjachina gita a·jani DC, u·iataniko on·angan baksa, re·jomanikoba somoi gitan matchotatchina ge·etaniko on·angahachim ine nikatna gita man·gen.
