Baghmara, March 31: Namgipa rama-jal·angrang donggijanichi songdongenggipa a·jani ba songni manderang mongsongbate wachi-karini somoio dingtang dingtang neng·nikanirangko chagrongna gita nangrongani gimin, South Garo Hills a·jani ning·o donggipa Siju bajaroni Siju Dobakkolona nadike tariatenggipa PMGSY ramako black topping ka·a matchotgijan galchipe donengani gimino uko nirokatchina gita Garo Students’ Union (GSU), Siju Regional Unit a·jani Deputy Commissioner-na lekka sedoataha.
Iani bidingo GSU, Siju Regional Unit-ni jakrikra Te Welbing Sangma-ni koborna seachi parakatani gitade, Siju Dobakkolona dakanggipa PMGSY ramako metre 400 ba 500 mangsan kam ka·atenba rama tariako matchotatgija donchipahachim.
Uni gimin je contractor-an Siju bajaroni Siju Dobakkolona black topping on·na gita kamko jako ra·e ka·ahachim, wachi ong·na skangan ta·rake kamrangko ka·eming matchotatchina dabie GSU, Siju Regional Unit, a·jani DC-na lekka sedoangaha.
