Bangmara, March 31: Siju elakani MDC gitcham aro Congress partyni a·gipi dilgipa Pa Hedrik A. Sangma aro gipin political dolrang, batanggimin salrango independent candidate ong·e susagiparang, March 30 tariko NPP dol baksa bakrimeaha.
Dolo napangani gimin talatengon, re·baenggipa April jani 12 tariko ong·atnasienggipa Garo Hills Autonomous District Council (GHADC) eleksino susaenggipa Siju elakani NPP candidate Pa Arbinush R. Marak-na rakbate kamrangko ka·na gita NPP dolo bakrimetokaha ine parakataha.
Koborna parakatani gita, sokbaenggipa eleksinni bidingo manderangna aganprakaniko dakna, a·dokni Power Minister Pa James Pangsang K. Sangma salni tom·anio dal·batgipa sokgipa ong·e bakko ra·angaha.
Pa Sangma, re·baenggipa GHADC eleksino Siju elakani NPP candidate ong·e susaenggipa Pa Arbinush Marak-na chakpaniko on·e ua jolni manderang baksa ku·mongrimna gita March 30 tariko Siju elakaona wenangaha, maina Siju elakaan Garo Hills-o mongsongbatgipa GHADC seat-rangoni ge·sa ong·achim aro ia eleksino NPP dolan chegen ine Pa Sangma an·tangni ka·dongsoaniko parakataha.
