Gangtok, April 18: Sikkim-ni Gangtok jillaoni saksa bilsi 11-ong·gipa me·chikko drae til·ekgipa Bihar a·dokoni saksa bilsi 29-ong·gipa Pritam Dharma minggipako Gangtok police rim·aha ine koboro parakataha.
Ia obostani bidingo police-ni aganani gitade, dos dakgipa mande ua me·chik bi·sako drae kal·akani ja·man buringo so·ote galaha aro uni manggisiko, me·chik bi·saani gimaenganiko kobor on·ani salgittam ja·manosa mija April 14 tariko man·ahachim.
Me·chik bi·sani skul joke noktangchina re·bapilmitingo, dosko dakgipa mande an·tangni gario gadochina aganenba gate rimangaha. Iani ja·man, gario to chipna petrol station-o neng·takaha, jeon ua me·chiknaba cha·ani aro ringani bosturangko bree on·aha aro ja·mano uko sambajolni buringgripona salange drae til·ekaha ine police official koborna parakataha.
Ia mamlao, Sikkim police, Indian Penal Code (IPC) aro POCSO Act-ni dingtang dingtang section-rango panchake ua mandeko rim·aha.
Indake ong·engon, obostako chagronggipa me·chik bi·sani ma·gipa, uni demechikko sina skang saknaata gita apsandaken ua mandekoba sastiko on·china aro pasi on·e so·otskachina gita dabiangaha.
