Shillong, April 18: Garo Hills-o nangana bate ding•dugaengani gimin skul ka•anirangko nirokchina gita School & Literacy-ni Director RM Kurbah-ni ge•etaniko man•soani ja•man, West Garo Hills a•jao salo ka•enggipa pilak skulrangkon chutti watchina gita West Garo Hills a•jani Deputy Commissioner Jagdish Chelani ge•etaniko on•ataha.
West Garo Hills a•jani ning•o donggipa Primary, Middle, Secondary aro Higher Secondary skulrang gimikkon April 19 tarikoni April 21 tarikona, pring 8:00 bajioni attam 3:00 bajiona chipe donchina gita West Garo Hills a•jani Deputy Commissioner Jagdish Chelani ge•etaniko on•ataha indiba attamo ba walo ka•enggipa skulrangkode pangna ka•ronga gitan ka•angna man•aigen ine u•iataha.
National Deworming Day-na mop up exercise-ko re•baenggipa April-ni 24 tarik Sombar salo pilak skulrangon dakangskagen ineba West Garo Hills a•jani Deputy Commissioner u•iataha.
Ia sal somoirango Garo Hills gimikon ding•dugaengani a•sel skulo poraienggipa chatro chatrirangnasan ong•aigija, skigiparang aro gipin kamrangko ka•enggiparangnaba kenchakna nangani ong•enga ine skul ka•anirangko name nirokchina gita School & Literacy-ni Director RM Kurbah, deputy commissioner-rangna seachi u•iatahachim.
