Shillong, Oct 5: Sima-arirango kajia-golmal gnanggiparangko namatna gita Meghalaya aro Assam a·dok damgnian kamrangko ka·atengon, Jaintia Hills a·jani regional committee-ni membor Pa Lahkmen Rymbui, da·o October 9 tariko Assam, Silchar-o sima-arini gimin dolgni agangrikaniko dakanggen ine Mongolbar salo u·iataha.

Indake, a·dok damgnini regional committee-rang salni 2 bajimango tom·na tik ka·angaha aro Jaintia Hills a·jao simani bidingo dingtanggrikanirang dongenggipa biaprangoni damsa Ratacherra jolona re·ange uamang nieanikoba dakangjolgen.

Pa Rymbui-ni u·iatani gita, sima-arini gimin daitoko ra·enggiparangni dongpaanio a·dokni regional committee da·odipet Umkiang songo changgni dake tom·aniko ong·ataha je tom·anion regional committee-ni chairman Pa Sniawbhalang Dhar baksana a·jani Deputy Commissioner-ba ua somoirango dongpatokaha ineba ua u·iatkuaha.

“Ua biapni gimin a·dok damgnini meligrikgijaniko namatna maming neng·nikani dongjawa aro re·baenggipa Oct 9 tariko pilakkon talbate ma·sigen aro namgrikatani cholkoba chinga dakna man·gen,” ine Pa Rymbui parakataha.

Janapjolna gita, Assam aro Meghalaya a·dok damgnian ru·uta bilsirangna kingking sima-arini bidingo golmal gnanggipa a·dok damgnini sima-ari jolrangchina wenange mija Sombar salo damsan nieaniko dakangaha. Cabinet-ni gadangni committee-rangko Meghalaya-chini a·dokni minister Pa Renikton Lyngdoh Tongkhar dilangaha aro Assam-chiniko Assam-ni minister Pa Atul Bora dilangskaaha.