Shillong, Oct 5: Mongolbar salo, Meghalaya a•dokni Chief Minister aro National People’s Party (NPP)-ni national president Conrad K Sangma, Congress dolko a•song gimikon soangenggipa dol gita toe aganangenba, sripangenggipa jahaso dongede maming namgni dongjawaha ine Congress dolni dilgiparangko gipin dolrango katnapchina gita didiangaha.
A•songo gitchambatsranggipa dol ong•eba bilsi gittamni ja•manoba doltangni president-ko seokna man•kujaenga aro ian Congress dolni ning•o dilgiparangna dilaniko aro dal•rorona man•gijaniko mesokani ong•a ineba Sangma, Congress dolko chonnike aganaha.
Mongolbar salo, Mawphlang-ni KHADC MDC, Lamphrang Blah-ko NPP-ona rimchaksona gita tom•aniko ong•atanio NPP-ni national president, jinmana aganprakangkuengon, a•song gimikon Congress dol soangengaha ine ma•siani giminsa Blah, NPP-ona katnapskaaha ine parakataha.
NPP dolo pilakan apsan nangrime kamko ka•gen, ia bye-election-ko chegen aro ia constituency-ko namroro silroroaniona ra•anggen ineba Sangma parakataha.
NPP-ko maikai chonaoni dal•roroataha aro maikai ia dol Tribal-rangni namgnina kamrangko ka•engachim, uarangni giminba ia tom•anio Sangma talate on•angaha.
“Skango India a•song gimikon NPP-ni MLA sakgnisan dongaiachim indiba ka•sinsin da•o bilsichetni gisepon Arunchal Pradesh-o MLA-rang dongaha, Manipur-o minister-rang dongaha aro Nagaland-oba MLA-rang dongaha. Meghalaya a•dokode NPP-an sorkariko dilenga,” ine Sangma parakataha.
NPP-ni niamrango, miksonganirango aro nikjumanganirango manderang bebera•ani giminsa ia pilakan chu•sokgipa ong•aha ineba ua aganaha.
