Shillong, Jan 19: Sima-arini bidingo jajrenge aro engtogija ong•e dongengipa songdok songrangni gimin, da•o Meghalayani stateko maniani salna skang namatna nanga ine HSPDPni skotong KP Pangniang aganaha.

Kobor ra•giparangna aganengon, “ Koborangode dilgiparangni tom•e chanchigrikanirangko aganrongenga indiba Assam aro Meghalaya state ge•gnini ia songrangni gimin aro uamangni bon•kame chanchianirangko parakatanikode niksomankujaenag” ine kobor ra•timgiparangna ua aganangkuaha. “Beben iana namgipa chol aro chanchigrikaniko on•ade altuade ong•ja, indiba iana an•ching iani ja•pang-ja•dilko sandie nampilaniko ra•banade nangchongmotengaha aro uamang Meghalayani state man•aniko maniani sal January 21 na skang iako parake on•ode anga kusi ong•begenchim ” ine ua agandapangkuaha.