Shillong, March 15: Shillongoni Delhi-ona bilrurana tik ka•gipa Flybig sildoreng tik ong•jaenganiara iako sket-bakket dakanichiba ong•aha ine transport minister Dasakhiatbha Lamare mongolbal salo MLA Mohendro Rapsangni sing•anina aganchakaha. Ia Flybig sildoreng jemangan an•tangtango chu•onga gita bostu aro uko chalaigipa aro kam ka•giparang chu•ongja uamang baksa segrik-jotgrike kam ka•aniara gisik seng•e dakani ong•ama ine AITCni president Charles Pyngrope sing•doaha. Ia sing•anina Lamare aganchakengon, “iako dakaniara namen ta•rakdugae dakani a•selsa ong•aha, skanggipa changna ong•ani gimin iarangni gimin chingaba mamingkon u•ipajaha aro ian chingna skie ra•ani gitaba ong•aha. Indiba uamang chingna kamrangko chu•sokatna ku•rachakaha, maibakai ia jarango kamrang chu•sokna man•jaode dingtang ja•kuko de•anggen” ine Lamare aganchakaha.
Iani gimin skotong minister talataniko on•engon, iako chinga kam ka•nagiparangna tenderko on•aha, uamangan sildorengko ra•bae on•ani aro pilak kamrangko ka•anina segrike-ra•aha. Minggipinara ia kamko covid sajinmana skangan dakahani gimin adita ja•donggaatanirangkoba man•aha ine aganangaha. Flybig sildorengrangko on•na aro Spicejet baksa segrike Q400ko jakkalnaba tik ka•grikahachim indiba ja•mano Spicejet ba iako on•a jechakpilahani gimin pilakkon dontongna nangaiaha ineba skotong minister talatangaha. Sildorengrang name kam ka•jagenchimoba chinga iako niroke kam ka•enga.
Ia onchongchakramara gipinko toede namen chonbeani gimin Boeing 737 rangba bilona man•ja. Unigimin iako ta•rake jakkalna man•na gita raken kam ka•enga ineba skotong minister talataha.
