Shillong, Mar 15: Hynniewtrep Peace Committee-ko songchina aro sorkari baksa agangrikanirang chu•sokgipa ong•na man•na gita Hynniewtrep National Liberation Council (HNLC)-ni kosako sandianirangko dontongchina sorkarina seatani ja•man Meghalaya sorkari, Mongolbar salo tom•e chanchirimangaha.

Cabinet tom•ani ja•man kobor ra•timgiparangna talataniko on•angengon, HNLC bobil dol baksa agangrikani kamrang a•bachengaha aro ku•baltitimgiparang kamtangtangko a•bachengna nanggnok ine a•dokni Chief Minister Conrad K Sangma parakataha.

Bobil dolni kosako operation ka•aniko dontongatgenma ine sing•on, dolgnini gisepo agangrikanirang a•bachengani ja•manosa obostarangko name ma•sina man•gen ine Sangma aganaha.

Ku•baltitimgipako songani bidingo HNLC-na seachi u•iatahama ine sing•on, uamang baksa sorkari dingtang dingtang cholrang gita agangrikaha aro uamang sorkarini songe on•gipa mandeko kusi ong•en ra•chakenga ine Chief Minister parakataha.

Bobil dolrang baksa agangrikanio dingtang dingtang niamrangko ja•rikna nangani gimin somoide nangrongaia ineba Chief Minister talataniko on•angaha.