Shillong, Mar 15: Jaintia Hills Autonomous District Council (JHADC)-o salgnina ong•atenggipa budget session-ko Mongolbar salo a•bachengataha aro ia salo JHADC-na gong kror 12.89 ong•gipa deficit budget-ko JHADC-ni chief executive membor (CEM) Thombor Shiwat ra•angaha.Deficit budget-ko JHADC-ni membor-rangna mesokatani somoio JHADC-ni CEM aganprakatengon, 2022-23 bilsina Estimate Receipt-ara gong 192,05,16,000 ong•enga aro Estimate Expenditure-ara gong 204,94,48,300 ong•enga ine parakataha.

JHADC-o kam ka•enggipa manderangna bilsio bariatenggipa dormaha, membor-rang aro kam ka•giparangna revise pay-ni 40% arrear-rangko ia bilsini gisepo chu•gimik gamna man•jae gital bilsiona ra•doatna nangahani a•sel budget-rang chu•ongjaha ineba Shiwat parakataha.

Ia session-o opposition MDC-rangba aganprakengon, JHADC-ara jakgitelgipa bimangsa ong•genchimoba sorkarini ning•osa dongna nangenga aro tangka paisarangko an•tangari bikotna man•jaenga ine Executive Committee-ko matnangataha.Ia budget session-ni skanggipa salo, Het Pohthmi-ko JHADC-ni Deputy Chairman-na seokangjolaha.