Shillong, March 1: Batanggimin bilsio a·doko skigiparangko kamna rim·anio cha·bokani mamlao India-ni Supreme Court-oni saksa a·gipi advocate ba ukil Pa Salman Khursheed, Sombar salo District Judge-na mikkang pa·angaha.

Kachario mikkang pa·anga ja·man koborna agananio, “Mamlani bidingo High powered committee-ni report sokaha aro sak 187 skigiparangko kamo rimnappilaha indiba sak 66 mangkode da·oba rimnappilna kragijaon donangkuenga ine Pa Khursheed agan-talataha.

Janapjolna gita, batanggimin 2017 bilsini November 2 tariko Meghalaya High Court-ni division bench, skigiparangko kamna rim·ani somoio cha·bokani mamlao pangchake porikkako ra·chakgipa gimik dam chikking centre-rangni kosako CBI-chi sandirokatchina ge·etaniko on·angaha. Ua somoimitingo, dam bonga sub-centre-rangni ia mamlao nangchapaniko High Court sandiataniko dakengachim.

Matnanggimin gita, dam bonga centre-rango ong·gija dake seoka man·gipa mitam skigiparang iani bidingo Apex Court-ona re·angtokahachim.

Ua somoio MLA ong·enggipa aro Education department-ni chua gadangni officialrang gimikko ia mamlao man·chapate skigiparangko kamna rim·ani somoio cha·boke dakanio dos donggiparangko CBI-chi sandirokate rim·a man·aniko parakatani ja·man gimik-gimang sak 260 skigiparangni kamrangko bon·ataha.

Kamna dorgasto on·gipa candidate-rangni porikka seani score sheet-rangko taridapani gimino kamoni neng·takmangimin sorkari officialrang Pa J. D Sangma aro Pa AI Lyngdoh-maang baksana Education minister gitcham Ma Ampareen Lyngdoh-ni kosako CBI, charge sheet-ko on·angaha.

Iana skang, skigipani kamna mande rim·na porikkako ra·chakanggipa dam bonga biap ba centre-rango daksrukanirang donganiko CBI-chi sandiate man·aniko skanggipa parakatani ja·man a·dok sorkari, ong·gija dake seokako man·gipa sak 246 skigiparangni kamkoba bon·attokaha.

Bangki centre-rango ong·gija daksrukanirang donganiko CBI-chi matchote sandiatani ja·man mija bilsi June 29 tariko, Education department ong·gija seokako man·gipa sak 260 gipin skigiparangni kamkoba bon·atdapaha.