Tura, Feb 15: Batanggimin bilsi bongana Songsak constituency-ni MLA ong•e kamko ka•anganio a•dokni gitcham chief minister aro Trinamool Congress (TMC)-ni dilgipa Mukul Sangma, Songsak-ni manderangna tol•e ku•mikchetaha ine Mongolbar salo, Songsak constituency-ni National People’s Party (NPP) candidate Nihim D Shira matnangataha.
Songsak-ni manderangna an•tangni ku•mikchetanirangko chu•sokatna man•jaesa Mukul, manderangna kenenba Tikrikilla constituency-ona katangskaengaha ineba Shira matnangataha.
2018 bilsini Assembly election-o Mukul Sangma, Ampati aro Songsak constituency-oni susae chegipa ong•ani ja•man, Ampati constituency-ko watbae Songsak constituency-ni MLA ong•e kamko ka•ahachim. Ia 2023 bilsini Assembly election-ode ua Songsak aro Tikrikilla constituency damgnioni susaskataiengachim ine nikna man•a.
