Tura, Feb 13: Re·anggipa December jaonin South Garo Hills a·jao full fledged ba chu·gimik kamko jako ra·e ka·gipa deputy commissioner-ko man·kujaengani gimin a·jana ta·raken Indian Administrative Service (IAS) gadangni officer-ko deputy commissioner songchina Garo Students Union (GSU) dabiangaha.
South Garo Hills a·jani gitcham deputy commissioner Hubert B Marak, jean IAS officer ong·achim, re·anggipa December jani 31 tariko kamoni neng·takangahachim aro uni kam watangaonin South Garo Hills a·jao additional deputy commissioner (ADC) Mary T Sangma-sa deputy commissioner-ni kamkoba jako ra·engachim.
Indake ong·engon, iani bidingo GSU Mindikgre regional unit-ni president Greneth M Sangma, a·dokni Chief Minister Conrad K Sangma-na sedoataha aro South Garo Hills a·jao ong·enggipa obostarangni bidingo janapatenba ta·raken IAS officer saksako deputy commissioner songe on·china didiataha.
“South Garo Hills a·jara Bangladesh a·songni simao ga·akgipa biap ong·enba, ia jolrango matchu cha·ue palsrukanirang, niam gri koela badinganirang aro bobil dake chakatgipa manderangni re·ruraanirangko nikna man·ronga,” ine GSU-ni president janapatenba, iandakgipa kamrangko nirok sandina South Garo Hills a·jao ta·raken deputy commissioner-ko nangenga ine parakataha.
South Garo Hills a·jao rama jal·langrang namsrangjani a·sel police aro BSF dolni sipairangba nirok sandina gita re·ruraanirango neng·nikanirangko chagrongna nangrongenga ineba GSU parakataha.
South Garo Hills a·jana ia February jani gisepon DC-ko songe on·china gitaba GSU, sorkario dabiangaha.
