Shillong, Oct 28: Shillong Sports Association-ni ong·atgipa Under 21 Fourth Division 2021 edition-na robol ga·tingsusaatani finalko Shillong, J. N Stadium-o Bristibar salo kal·ango dolgnian amgrikjani gimin penalty dokgrikatao Tynring Sports Club, 4-2 golrangchi dolgipin Pay For Right (PFF) FC-ni kosako chegipa ong·e niksengangaha.
Kal·ani a·bachengo PFR-ni Winaldy Suting (17) neng·takna skang doltangna golsako chipchenge on·ahachim indiba kal·a matchotna skang mangmang dolgipinchini Damebanker Lyngdoh (10) freeckick-o gnigipa golko chipdape dolgnikon apsangrikataha.
Indake ong·engon, finalko kal·susaanggipa Tynring aro PFR dolgnian mikkangchi SSA-ni ong·atgnigipa Third Division 2022 edition-ona ra·doatako man·tokaha.
Janapjolna gita, a·gimikchi giprorogipa corona sajinmani sokbaani a·sel bang·a neng·nikanirangko man·eming bilsi-gnirangna dontongatako man·ani ja·man robol ga·tingsusaani ia bilsionisa tangchapiltaiaha.
Unomiting, kal·a matchotani ja·man Tynring-ni B Licence Coach, Seibor Sana-ni kobornna agananganio, sajinma sokbaani a·sel kal·giparang ranta ka·anio neng·nikanirangko chagrongaha maina uamang online class-rango dongna nangeming pring mangmangosan ranta ka·na cholko man·aiaha ine janapatan baksa, kontagni-gittamsan chinga ranta ka·na cholko man·eming kal·anio namen ka·sinaha indiba ching dolni rake kam ka·anichi aro on·kanganichi da·alo chinga ia kal·susaanio namgipa biapko man·na gita chol ong·aha ine agandapataha.
Kal·susaanio chee niksenggipa Tynring dolna trophy baksa tangka nogot gong 30,000-ko boksis on·angaha indake, Runner’s Up-o chegipa PFR, trophy baksana gong 15,000 tangka nogot boksisko ra·chakangskaaha.
