Shillong, Nov 24: Meghalaya a•dokni SSA skulrango skigiparangna dormaharangko on•na man•jaengani a•sel skigiparang neng•nikanirangko chagrongna nangengani gimin sorkari, ia neng•nikaniko namatna gita pangkamgipa cholko sandienga ine Budbar salo, Meghalaya a•dokni Education Minister Lahkmen Rymbui parakataha.
Iani bidingo kobor ra•timgiparang baksa agangrikengon, skigiparangni neng•nikanirangko namatna gita sorkari, pangkamgipa cholko sandina nangnikenga ine Rymbui parakataha.
SSA skigiparangni kamko regularise ka•china dabienggipani bidingo janapatskaengon, niamo pangchakesa sorkari, ja•kuko de•na nanggen ine Education Minister parakataha.
Rymbui-ni aganani gitade, SSA skigiparangko sorkaride an•tangari kamo rakkigipa ong•jani gimin sorkaride skigiparangni kamko regularise ka•na man•jawachim.
“SSA skigiparangni kamko regularise ka•aniara altua kam ong•ja aro ian a•dok sorkarini jakosa ong•ani gimin obostarangko nigrike ja•kuko de•na nanggen. Skigiparangni dabianiko ra•chaknade altua indiba iako chu•sokgipa ong•atnade namen rakbeani ong•gen,” ine Rymbui aganaha.
Chuttirangni a•sel ma•mong sorkarioniko man•sogipa gong kror 59 tangkarangko watatna man•kujaenga ineba Education Minister parakataha.
Meghalaya a•dok gimikni sak 12,541 skigiparangna, uamangni man•na nangkuenggipa jabongani dormaharangko on•china aro skigiparangni kamko regularise ka•china gita Meghalaya SSA Schools Association (MSSASA) sorkario dabiengachim ine nikna man•a.
