Shillong, August 5: Meghalaya Board of School Education (MBOSE)-ni ong•atgipa Secondary School Leaving Certificate (SSLC) aro Higher Secondary School Leaving Certificate (HSSLC) Arts porikkani result-rangko Bristibar salo parakataha. Ia bilsini SSLC porikkao West Khasi Hills a•jaoni St Thomas Higher Secondary School, skanggipa biapko man•aha aro HSSLC Arts porikkao St Anthony’s Higher Secondary School, skanggipa biapko man•taiskaaha.
SSLC porikkao Mairang-o donggipa St Thomas Higher Secondary School-ni Kevinstrong Lawriniang, 576 mark-rangko man•e Top 20-ni skanggipa biapko man•aha aro Mookaiaw-o donggipa Sawlyngdoh Higher Secondary School-ni Wanteibok Pator, 575 mark-rangko man•e gnigipa biapko man•skaaha. Top 20-ni gittamgipa biapko Shillong St Mary’s Higher Secondary School-ni Khasish Samee aro Tura Sherwood School-ni Mridumay Saha sakgnian 574 mark-rangko man•e sualgrikskaaha.
HSSLC Arts porikkao Shillong St Anthony’s-ni Daniel Ksanbor Khyriemmujat, 462 mark-rangko man•e Top 10-ni skanggipa biapko man•skaaha aro St Edmund’s Higher Secondary School-ni L Kennedy Vaiphei, 450 mark-rangko man•e gnigipa biapko man•skaaha. St Anthony’s-ni Jethro Jarvis Roy Jyrwa, 449 mark-rangko man•e Top 10-ni gittamgipa biapko man•skaaha.
SSLC aro HSSLC Arts porikkarangni result-ko parakatani ja•man, Meghalaya a•dokni Chief Minister Conrad K Sangma aro Education Minister Lahkmen Rymbui-ba porikkao chu•sokanggipa pilak chatro chatrirangna an•tangtangni namgipa skaniko parakataha.
Ia bilsini SSLC porikkao pass ka•ani percentage, re•anggipa bilsiona bate bang•gija nambata maina re•anggipa 2020 bilsio pass ka•ani percentage 50.31 percent-san ong•aiachim indiba ia bilsiode 52.91 percent ong•skaaha.
HSSLC Arts porikkaoba ia chang pass ka•ani percentage 76.28 percent gapaha.
Ia bilsini SSLC porikkako a•doko donggipa dam 630 skulrangoni gimik sak 64,269 chatro chatrirang seahachim aro ia chatro chatrirangoni sak 34,003 chatro chatrirang pass ka•na man•aha. HSSLC Arts porikkako dam 237 skulrangoni sak 25,683 chatro chatrirang seskaahachim aro ia chatro chatrirangoni sak 20,740 pass ka•skana man•aha.
SSLC porikkao East Jaintia Hills a•ja 85.09 pass percentage-ko man•e a•doko nambatgipa ong•aha aro South West Garo Hills a•ja 23.01 percent-ko man•e komibatgipa ong•skaaha.
HSSLC porikkao West Khasi Hills a•ja 92.91 pass percentage-ko man•e bang•batgipa ong•aha aro South Garo Hills 54 percent-ko man•e komibatgipa ong•skaaha.
