Tura, May 26: Ia 2023 bilsini Secondary School Leaving Certificate (SSLC) porikkao 564 mark-rangko man·e Top 20-ni gittamgipa biapo chu·sokanggipa St Xavier’s Higher Secondary School-ni chatri Salrime M Sangma-na Sukrobar salo, skulni headmistress, skigiparang aro chatrirang, dingtangmancha mande ra·pilskaaniko dakna gita program-ko ong·atangaha.

Ia program-ko ong·atanio Salrime-na mande ra·pilskaani chin gita dingtangmancha skulni gitko jinma ring·aha aro skulni headmistress baksana skigiparangba una mittelpilani kattarangko aganangaha.

Ia bilsini SSLC porikkao Top 20-ni gittamgipa biapko man·e chu·sokanggipa Salrime M Sangma-ko uni ma·gipasa, chonbegipa dokkanko chalaie, poraina gita dakchakaha aro uamang chol ong·pajaenba, tuition-koba ra·na man·pajahachim. Iandakgipa neng·nikanirang baksa ua poraina nangahaoba ia porikkao teng·sugipa ong·e, uni skulnasan ong·aigija A·chik jat aro a·songna mikkim rasongko ra·baaha.