Williamnagar, Apr 29: Ia 2025 bilsini Secondary School Leaving Certificate (SSLC) porikkao letter mark-rang baksa first division-o pass ka•anggipa St Francis De Sales Secondary School, Nongalbibra-ni sak 38 chatro chatrirangna Mongolbar salo, Meghalaya a•dokni Education Minister aro Rongara-Siju-ni MLA Rakkam A Sangma, mande ra•pilskaaniko dakangaha.
Rongara-Siju constituency-o chatro chatrirangko poraianirango gisik nangbatatna gita bilsibrina skang Education Minister an•tangan letter mark man•e pass ka•giparangna tangka paisarangko boksis dake on•na a•bachengatahani gimin ia program-ko ong•atanioba letter mark man•e pass ka•gipa chatro chatrirangna subject mingprako gong 5000/- ka•e tangkako boksis dake on•angjolaha.
Tom•a a•bachengao, St Francis De Sales Secondary School-ni principal, Father Abraham Puthenpurachal, rimchaksoani kattarangko aganangengon, chatro chatrirangni aro skigiparangni bimchipe kamko ka•anina iandake boksisrangko on•pilskaengani gimin Education Minister-ko mittelpilangenba, iandake ja•kuko de•chakatanichi ia jolrango lekka pora tang•dobana man•engaha ine parakataha.
Ia tom•anio a•dokni Education Minister Rakkam A Sangma, tom•anio bak ra•giparangna aganprakangskaengon, SSLC porikkao pass ka•gipa chatro chatrirangna aro ia skulna, Chief Minister Conrad K Sangma aro Cabinet-ni pal, namgipa skaniko on•angenba, ia jolrango donggipa chatro chatrirangko poraianirango chu•sokgiparang ong•na didina gitasa ia mande ra•pilskaani program-ko ong•ataha ine parakangaha.
Chatro chatrirangko gisiko nange poraichina didina gita letter mark man•gipa chatro chatrirangna tangka paisako boksis dake on•na ua bilsibrina skang a•bachengataha ine janapatengon, ia constituency-ni MLA ong•e dangdike on•angkua dipet ua iandake letter mark man•e pass ka•gipa chatro chatrirangna boksisrangko on•angkugen ine Sangma, ku•rachakaniko on•angaha.
Rongara-Siju constituency-o donggipa chatro chatrirangoni saoba, Top 10-o biapko man•e pass ka•genchimode ua chatro ba chatrina ua India a•songni je institute-oba admission-ko on•na gita an•tangan dakchake on•gen ineba Sangma, ku•rachakaniko on•angaha.
Ia bilsini SSLC porikkao teng•suanggipa sak 38 chatro chatrirangko mittelpile aganangengon, uamangni chu•sokanirangko daksningchina gita Class X-ni chatro chatrirangkoba Education Minister didiangaha. Porikkao namgipa result-rangko man•na dakchakahani gimin ua skigiparangkoba, uamangni rakbee kamko ka•ahani gimin Sangma mittelpilangaha.
Ia tom•anio a•dokni Education Minister, dingtangmancha higher secondary school-ni skigiparangna dormaharangko on•na man•na gita gong lak 5-ni cheque-koba pakwate on•angjolaha.
Ia apsan salon, Aban Memorial Secondary School-oba apsan dakgipa program-ko ong•atangenba, porikkao name chu•sokanggipa sak 25 chatro chatrirangna mande ra•pilskaaniko dakangaha. Unbaksana Seroni Nengminja Sec School-ni sakgittam aro Pathargittim Secondary School-ni sakgni chatro chatrirangnaba Education Minister-ni jakchi, boksisrangko on•e mande ra•pilskaaniko dakangaha.
Na·simang ia video-koba nina man·gen:
Na·simang iakoba poraina man·gen: ICFAI Tura, Career Counselling Program-ko ong·atanga
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Instagram- www.instagram.com/ne_media_hub
