Shillong, Nov 28: Federation of Khasi Jaiñtia and Garo people (FKJGP), Sombar salo, a·dokni Health Minister Pa James Sangma-ko grongenba Shillong, NEIGHRIMS-o Nursing Officer aro Staff Nurse-ni biaprang bangbang ong·enggipana dorkastorangko on·e porikka sena am·enggipa candidate-rangni chagrongenggipa neng·nikanirangko talate on·angaha.

Iani bidingo FKJGP-ni dilgipa Kitborlang Nongphlang-ni koborna aganangani gita, mikkang jao Jaipur aro Assam-ni mitam biaprango porikkarangko sena gita seoka man·gipa candidate-rangni chagrongenggipa neng·nikanirangni bidingo agan-chanchirimna gita miksonge chinga health minister-ko grongaha ine parakataha.

Federation, iani bidingon NEIGHRIMS-ni Director-ko gronge unbaksa agan-golpogrikna gita somoiko bi·ahachim indiba ua biaptango dongjani a·sel mamlani gimin agangrikna cholko man·jaha ineba Nongphlang aganataha.

Uni aganangkuani gitade, somoirang bakkandikahani a·selo Health minister chingna maming ka·dongataniko on·ata dongjaha ine janapatenba, haida antisarang skange chinga minister-ko grongena man·ode sorkarini gita maikobade dakchakna man·naba gnangchim, maina, ian India gimikna ong·atenggipa porikkasa ong·ani gimino ia mamlako agangrikna gita a·dok sorkarina somoiba bakkandikaha ineba Nongphlang agandapataha.

Uni u·iatani gitade, batanggimin 2019 bilsionin NEIGHRIMS-o ge 2000 mangni gita staff nurse-na biaprang bangbang ong·e dongengachim, indiba sajinma sokbaani a·selo porikkako ia bilsini December 2 tarikona ra·doataha.