Shillong, July 29: Skang 1971 bilsio India aro Pakistan a·songni gisepgriko dal·begipa dakgrikanio songsul a·song Pakistan-ni kosako India-ni cheaniko gisik ra·ani gita Swarnim Vijay Varsh-ko manienganio, Swarnim Vijay Mashaal-ko a·dokni skotong minister Pa Conrad K Sangma, Bristibar salo Shillong, Polo Ground-o ra·chaksoaha.
Ia Mashaal, jean re·anggipa 2020 bilsini December 16 tarikoni New Delhi, National War Memorial-oni a·bachenge dingtang dingtang biaprangko napakbaenba Meghalaya a·dokona mija July 27 tariko sokeaha aro iako Shillong songjinmani Polo Ground-o Bristibar salo skotong minister-ni jako pakwatangaha.
A·songko chelchakgipa matgrikrang ong·e 1971 bilsio India aro Pakistan-ni gisepgriko dal·begipa dakgrikanio uamangni on·kanganirangna Indian Armed Force-rangko dingtangmancha mande ra·ani gita aro songsul a·song Bangladesh-ni jakgitelanina kusi ong·aniko mesokpaani gita Polo Ground-o tom·anikoba ong·atangjolaha. Ia tom·anio, Meghalaya-ni niksenggipa aro dal·dalgipa dilgiparang, a·gipi military aro police officialrang aro chelchakgipa dolo dangdike on·anggiparang gimikan bakko ra·angtokaha.
Tom·ao bak ra·gipa jinmana aganprakengon, “a·songko chelchakanio jatni aro a·songni namgnina an·tangtangko on·kange so·ota man·giparangko chinga mande ra·bee salam ka·a aro apsandaken a·songna uamangni on·kangani gnang kamrangko ka·anina an·ching Armed Force-rangko mande ra·angkuna gita nanga ine agangangan baksana, chadamberangkoba ianoniko namgipa didianiko ra·e a·songna dangdike on·na gita cholrangko basetokchina gitaba skotong minister dingtangmancha agan-ku·pattiangaha.
