Shillong, July 29: Meghalaya a•dokni bang•bata a•jarangon manderang Covid-ni tikako su•na jechaktokengani a•sel ra•biani ong•enga aro uni constituency-oba apsan dakgipa neng•nikanikon chagrongna nangenga ine Mawhati constituency-ni MLA Dasakhiat Lamare parakataha.
Lamare-ni aganani gitade, COVID-ni tikako su•e ra•na nangchongmotengani gimin pilak biaprangon manderangna talatanirangko on•engoba manderang, ia tikako su•na gita kentokenga.
“Anga an•tangba ia antion gnigipa tikako Nongpoh-o su•e ra•gnok aro ia tika su•ani salo anga dingtang dingtang songni nokmarangko aro dilgiparangko okamate ia tikako su•ani bidingo talate on•na kamko ka•gen,” ine NPP-ni MLA parakataha.
COVID-ko warachakna gitade tikako su•e ra•na nangchongmotengoba uni constituency-o bang•bata manderangan tikako su•e ra•na kentokenga ineba Lamare aganaha.
Maini gimin manderang kenchaktokbatenga ine sing•on, manderang toromni gita aro politics-ni gita kenbattokenga ine Lamare aganaha.
“Politics ine aganengon, Aadhar-na biming segatanio nikgimin apsan obostako anga miksongenga. Aadhar-na biming segatanioba manderang keneming bimingtangtangko segatna siktokjahachim. Manderangni gisiko dingtang dingtang chanchianirang sokbae bimingrangko segatna siktokjaha aro ia COVID-ni tikako su•anio apsan obostakon nikna man•enga,” ine Mawhati MLA aganaha.
Manderangko tika su•na didianio a•dok sorkari aro Health department, toromko dilenggipa manderangni dakchakanirangko ra•na tik ka•aha aro bang•bata biaprangon toromni dilgiparang, manderangko kengija tikarangko su•e ra•china diditokengahachim.
Manderangko tika su•atna gita ua maiba cholrangko jako ra•genma ine sing•on, uo adita dakna miksonganirang dongenga ine Lamare aganaha.
Adita salrangna skangsan, Lahkmen Rymbui aro Wailad Shylla gita dakgipa MLA-rangba, manderangna tangka paisarangko aro ma•manti cha•ani bosturangko suale on•anichi manderangko tika su•china didiahachim aro iani ja•man bang•a manderangan tikarangko su•e ra•tokahachim.
Indake ong•engon, Mawhati constituency-o COVID man•giparang dongkuengoba jagittam skangna batede da•o obostarang namkalengaha ine Lamare parakataha.
“Manderangko an•ching draede tika su•atna gita man•ja indiba an•ching jotton ka•angkunade man•gen,” ine Mawhati MLA parakataha aro tikani bidingo tol•e jangbingbangatenggipa manderangkoba matnangataha.
