Shillong, Sept 8: A·dokni a·paloni taxi-rangko Meghalaya-ni tourist biaprangona napbaaniko champengna skang, Tourism Minister Paul Lyngdoh, All Khasi Meghalaya Tourist Taxi Asssociation-ko (AKMTA) Assam-ni taxi chalaigipa dolrang baksa agangrikchengna ge·etaniko on·aha.
Iana salsa skang, AKMTA Assam-ni gari-rangko Meghalaya-ni tourist biaprangona salanganirangko champenggenchimode, Assam-ni taxi chalaigipa pilak dolrangko Meghalaya-ona salruraaniko dontongatnaba donga ine Tourist Transporter Association of Assam (TTAA) parakataha.
“Anga iakon niksamsoe mikrakataniko on·soahachim. An·ching ia a·gilsako janggi tangengon saksa sakgipino pangchake janggi tanga. An·ching an·tangani janggi tangna man·ja aro an·ching jeko daka, namedake chanchie aro niamo pangchake dakna nanga,” ine TTAA-ni parakatani gimin janape Lyngdoh Sombar salo kobor ra·timgiparangna aganaha.
“Chinga gari chalaigipa dolrangba baksa agangrikanirangko dakenga aro changsatai chinga uamango Assam-o gari chalaigiparang baksa agangrikchengna didianiko on·gen. Meghalaya-ni sima ari badee gipin a·dokrangchi nangchake maiba a·selrang ong·genchimode, ua a·dokni apsandakgipa dolrang baksa agangrikanirangko dakna nanga. KSU Assam-o maiba neng·nikanirangko man·genchimode, uamang ASU baksa agangrikanirangko daka, uni gimin chinga ia gari chalaigiparangkoba Assam-ni apsandakgipa dolrang baksa agangrikanirangko nangnika,” ine Lyngdoh agandapaha.
Assam-ni garirangko tourist biaprango champengsoaniara niamni a·palo ong·ama ong·ja ine sing·on, “Ia garirang national permit donga, ba a·dok damgittam ba Assam, Meghalaya aro Arunachal Pradesh-o salrurana man·a. Media-ni manderang ong·a, ia association-rang an·tangtangko bimung segate an·tangtangni office-rangko chalaiama chalaija sandie nichina anga na·simangna didianiko on·atenga. Uamang transport department-o bimung segataniko daktelna nanga. Uamang iako dakjokma?” ine Lyndoh sing·doaniko dakaha.
Una agreba, a·dok sorkario dabianirangko dakna skang, uamangko biaptango niamni gita nanganirangko chu·sokatchengchina ua AKMTA-na aganaha.
Uandake, Meghalaya-ni obosta-ra Sikkim-oni dingtanga maina Meghalaya-ara re·pakgipa a·dok ong·a. Bang·a garirangan Meghalaya gita re·paka maina tourist-rangara dingtang dingtang biaprangona rona re·bae a·doko nappaka. Sikkim-de bon·chotegipa biap ong·ani gimin obostarang dingtanga ine Minister janapaha.
“Meghalaya-ara re·pakgipa a·dok ong·a, bang·a garirangan Meghalaya a·dok gita re·paka, aro ua garirang Meghalaya-osan rorame bon·a nangai ine ong·ja. Mitam tourist-rang North East-o rorame roa, aro Kazirang-oni Shillong-ona aro Sohra-ona re·baa aro uni ja·mano SIlchar-ona re·anga. Iandakgipa songregiparangara a·dokko re·pakgiparangsa ong·a. Sikkim-ode a·palchini tourist taxi-rangko ine toe agananide ong·ja maina na·a niatgenchimode, West Benga-ni bang·a garirangan tourist-rangko Sikkim-ona salangenga ine nikna man·gen,” ine minister talataha.
Bang·a gari salgiparangan loan-rangko chotjani a·sel PRIME-ni garirangko walpilna nangaha ine matnanganina, matnanganirangko jeba dakna man·aia indiba tourist-rangko dingtang dingtang biaprango salrurana garirang chu·ongja ine Minister aganangaha.
Uandake Lyngdoh, a·doko gari salgiparangko homestay-rang, resort-rang aro hotelrang baksa bakrime tourist-rangna dangdike on·china cholko mesoke on·aha. A·doktango songdonggipa manderang ong·ani gimin uamangna indake tik ka·anirangko dakna chol nambata ine ua aganaha. Gari salgiparang homestay-rang, resortrang ba hotelrangona manderangko rimbae on·enba, ua dongchakanirangba apsan garirangkon manderangko salrurana tik ka·e on·skana man·gen ine Lyngdoh talate on·angaha.
Indake ong·engon, tourism department AKMTA baksa changni chang tom·anirangko ong·ataha aro cholrangko sandienga ine Commissioner & Secretary in-charge Tourism Cyril Diengdoh parakataha. Uandake, mingsa chol-ara Guwahati Airport-o Meghalaya-ni garirangna parking fees-ko komiatanichi Assam-ni taxi-rang baksa apsan gadango ong·ate bate susaaniko ra·bagen ine ua janapaha.
Shillong Airport-ko dal·bate tarinasienga, aro indake dakanichi unona songrebagiparang batgnok, aro tourism nambatgnok ineba Diengdoh parakataha.
Uandake ia obostarangara namen neng·nikaniko on·gipa ong·a aro iano bak man·gipa dolrang jekai homestay nokgiparang hotelier-rang aro biapni dingtang dingtang dolrang dongani gimin, pilakan bakrime cholrangko namedake sandina nanggen ine Commissioner talate on·angaha.
Namedake chanchigija rai-rangko ra·anichi ong·gijagipa obostarangona soknaba gnang aro mikkangchi kachariona soknaba gnang ine Diengdoh mikrakataniko on·aha.
“Iana chinga cholrangko sandienga. Chingni bil-o iarangko namatna cholrang donggenchimode chinga uarangko dakna man·gen indiba iarangko dakna chinga namedake am·sandianirangko dakna nangkuenga Meghalaya-ni manderangba dingtang dingtang a·selrangchi bas aa-ding·anirangchi Guwahati-ona, Sirport-ona ba Railway Station-ona re·a, uni gimin chinga iarangko mamung neng·nikanirangko manderangna sokatjana gita pilakchinikon niate chanchie rai-rangko tik ka·na nanga,” ine talate on·angaha.
Na·simang iakoba nina man·gen:
Na·simang iakoba poraina man·gen: Scuba aro Combat Diving Exercise-ko sal dokna Indian Army aro Navy ong·ata
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
Download our app from playstore – Northeast Media Hub
