Shillong, Jan 13: Re•baenggipa 2023 bilsion Meghalaya Assembly-ni election-ko ong•attaina siengahani gimin ia term bon•ahaon ua Congress dolo dongkuani bidingo chanchigen ine Congress dolni dilgipa PT Sawkmie parakataha.
Iani bidingo kobor ra•timgipa manderang baksa agangrikengon, ua Congress dolni sakbonga MLA-rangni giminde aganna man•ja indiba ua an•tangde da•o dipet Congress dolon dongkugen aro term bon•ahaosa Congress dolo dongkugenma gipin dolo napanggen, uni giminde chanchigen ine Sawkmie parakataha.
Congress dolni gitcham dilgipa Dr Mukul Sangma gita dakgipa dilgiparangan Congress dolko wate katahani gimin uamang Congress dolni gipin dilgiparangni giminba aganna man•jawa ineba Sawkmie aganaha.
Shillong-o aro a•dok gimikon Congress dolko bilakatpiltaini gimin sing•on, Congress dolko bilakatpiltaina gitade uamang pilak constituency-rangon Congress dolna kam ka•enggipa manderang baksa apsan chanchirimchengna nanggen ine Congress MLA parakataha.
