Shillong, April 22: Gnigipa changna giproroenggipa COVID, skangona bate bilakbata aro ta•rakbate giproroenga ine Bristibar salo Meghalaya a•dokni Chief Minister Conrad K Sangma parakataha.
Tikarangko su•e ra•china gita manderangko didiangengon, manderangni janggirangko chel•chakna gita COVID tikako su•anisan chol ong•enga ine Chief Minister aganaha.
“A•doko songdongenggipa manderangoni 70 ba 80 percent-ko tika su•na man•genchimode aro an•chingo tika su•anirang chu•sokgipa ong•genchimode, an•ching manderangni janggirangko jokatna man•gen,” ine Sangma aganaha.
Meghalaya a•doko da•o dipet lak 1 baten COVID-ni tikarangko su•na man•aha aro tika su•giparangoni maming a•sel ong•anirang dongkuja ineba Chief Minister parakataha.
Indake ong•engon, da•o mikkang antignimangna sorkari, dingtang dingtang biaprango COVID-ni tikarangko su•na miksongenga ineba Chief Minister parakataha.
“Tikako su•e ra•ani ja•manoba an•ching COVID-ko man•kuainaba gnang indiba saanirang komikalgnok aro an•ching jo•ongko warachakna man•aignok,” ine Sangma talatangaha.
Tikako su•anisan chol ong•enga ine janapatengon, an•tangtangko naljoke rakkina gita ia COVID-ni tikarangko su•e ra•china gita Chief Minister, a•doko songdongenggipa manderangko didiangaha.
