Shillong, Sept 2: Ia sal somoirango Meghalaya a·dokoba Tourism baksana dingtang dingtang kamrangko ka·na a·bachengpiltaiengahaon, COVID-19-oni naljoke dongna man·na gita tikarangko su·e ra·china aro sorkarini dongimin dingtang dingtang niamrangko ja·rikjringchina a·doko songdongenggipa manderangko didiataha.
Meghalaya a·doko Tourism aro uandakgipa dingtang dingtang kamrangko a·bachengpiltaiengahani gimin talataniko on·angengon, COVID-19-ko warachakna nangengoba manderang janggi tangna nangani gimin kamrangkode ka·na nangaigen ine Bristibar salo, Health Services (MI)-ni Director Dr Aman Warr parakataha.
“COVID-19-ko warachakna an·chingna minggittam dakna nanggnirangko donmanaha aro uarangara, mask-rangko ganani, jakrangko rongtale rakkiani aro saksa sakgipinoni chel·tanggrike dongani niamrang ong·a. An·ching an·tangtangko naljoke rakkina gita ia niam minggittamko pangnan ja·rikna nanga,” ine Dr Warr aganaha.
Tol·e jangbingbanganirangko bebera·gija, tikarangko su·e ra·china gitaba ua a·doko songdongenggipa manderangko didiataha.
Dr Warr-ni parakatani gitade, da·o dipet tika su·ani East Khasi Hills-o 52 percent aro Garo Hills-o 57 percent-san ong·engpiti.
Tika ponggniko su·mangimin manderangni gimin janapatengon, tika ponggniko su·mangimin manderangna maina on·dapna nanganirang donggenchimode ma·mong sorkarioni u·iatani sokbaaigen ine Dr Warr parakataha.
Official-rangni u·iatani gitade, Budbar salo sak 264 manderang, Meghalaya a·doko COVID-19 man·dapaha aro tika su·kugijagipa sakbri manderang, COVID-19 man·e siangdapaha.
