Guwahati, Jan 24: Re•anggipa bilsini Tokyo Olympics-o medal-ko chebagipa Lovlina Borgohain-ko man•chape COVID-19-ko warachakenggipa aro agri entreprener-rangoni gimik sak 17 manderangna Sombar salo, Assam a•dokni dal•batsranggipa upattirangko on•aha.
Award ba upattirangko on•na gita dingtangmancha Guwahati songjinmani Srimanta Sankardev Kalakshetra-o program-ko ong•atangaha aro ia program-o Assam a•dokni Governor Jagdish Mukhi dongpae, ia manderangna upattirangko on•angaha.
Karkanarangko chalaienggipa Ratan Tata-na Assam Baibhav award-ko aro Dipak Chand Jain-na Assam Saurav upattiko on•aha indiba uamang ia program-ona sokbajahani gimin uamangni award-rangko ja•mano on•skana donangaha.
Assam a•dokni Chief Minister Himanta Biswa-ni social media-o parakatani gitade, onbatgipa gadango manderangna dangdike on•enggipa aro songsalna mikkim rasongko ra•bagipa manderangna Assam a•dokni ia dal•batsranggipa upattiko on•angaha.
Lovlina aro Jain baksana scientist Kamalendu Deb Krori, official Dr S Lakshmanan aro mingsinggipa Neel Pawan Baruah-naba Assam Saurav upattiko on•aha.
Medal aro certificate baksana Assam Baibhav upattina gong lak 5, Assam Saurav-na gong lak 4 aro Assam Gaurav upattina gong lak 3-ko boksis dake on•aha.
