Tura, Mar 12: Batanggimin salrango Garo Hills-ni dingtang dingtang biaprango, mongsongbate Tura songjinmao so•sojengjeng ong•anirangko nikna man•ahani gimin tom•tomaniko ra•bapilna gita Bristibar salo, Tura Municipal Board (TMB)-ni Chief Executive Officer (CEO) Jude Rangku T Sangma-ni dilanichi jinma tom•aniko Tura Circuit House-o ong•atangaha aro ia tom•anio, Peace Forum, Senior Citizens, dingtang dingtang gittimni Development Committee, jatko dilgiparang aro Mondolini dilgiparangba bak ra•angtokaha.
Ia tom•aniko ong•atani bidingo TMB-ni CEM, jinmana talate on•angengon, tom•tomaniko rakkianio sorkarini dakna nanggni kamrangko janapangenba, Tura-o so•sojengjeng ong•anirang batroroangjana gita District Administration-ni ja•ku de•anirangkoba agan-talate on•angjolaha.
Batanggimin salrango ong•anggipa a•selrangni gimin janapangengon, Scheduled Tribe (ST)-o nangchakegipa kamrangni gimin NGO-rang ku•rang on•aha aro iana A•chik sakantian bakrimaniko on•paahachim indiba badiaba dolrangsa miksongmanchae, manderangni aro sorkarini gam-jinrangko nisie galna cholrangko ra•skaaha ine Sangma aganaha. Iandakgipa kamrangara Tura-o songdongenggipa manderangnasan ong•aigija A•chik jat gimiknan ra•chakna man•gijani ong•a ineba ua aganaha.
Ia tom•anio Mondolini dilgiparang, dingtang dingtang gittimni dilgiparang aro jatko dilgiparangba, iandakgipa a•selrangna an•tangtangni suk ong•gijanirangko aro jegalanirangko paraktokaha. Jatni nanganirangna ku•rang on•e jingjengatanirangko dakengon, tom•tome aro nama bewalosa jingjengatanirangko aro jegalanirangko dakna nanga ineba ia tom•anio pilak dilgiparangan janapangtokaha.
Jingjengatanirangko dakanio, manderangni aro sorkarini gam-jinrangko nisie galanio jak donggipa manderangkoba ia tom•anio pilak dilgiparangan jegalangtokaha.
Mikkangchi iandake so•sojengjeng ong•atgipa kamrangko gittimtangtangni manderangan nirok sandiangna aro gittimtangtango tom•tomaniko aro ku•mong nangrimaniko rakkina gitaba ia tom•anio bak ra•gipa pilakan ku•rachakgrikangtokaha.
Bristibar attam 5:00 baji dipet, Araimile bibraoni a•bachenge, tom•tomanina jinma bi•rimaniko ong•atna gitaba ia tom•anio jinma tik ka•e donangaha aro ia bi•rimaniona re•bae bak ra•echina gita pilakkon didiangaha.
Na·simang iakoba nina man·gen:
Na·simang iakoba poraina man·gen: Tura-ni Bishop-rang Garo Hills-ni tom·tomanina okimu chake Isolo bi·china mol·molata
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
