Tura, March 12: Roman Catholic Diocese of Tura-ni bishop-rang Garo Hills-o aro a·gilsak gimiko tom·tomaniko ra·bana March 13 tariko okimu chake Isolo bi·aniko dakchina mol·molataha.
Tura-ni Bishop, Andrew R. Marak aro Tura-ni Auxiliary Bishop Jose Chirackal, mondolini dilgiparang aro bebera·giparangko gilja nokrango, dingtang dingtang biaprango aro noktangtango dingtangmancha bi·anirangko dake okimu chakangna mol·molaniko on·ataha.
Ru·uta bilsirangna tom·tomani aro silroro-namroroani ja·mano, Garo Hills-o ong·anggimin so·sojengjengrangna jajrenganirangko bishop-rang parakataha. Kajia-golmal ong·anirangchi manderangni janggirang gimaaha, mata-bu·anirangko man·aha, aro manderangni aro sorkarini gam-jinrang namen nosto ong·aha, uandake bang·a manderangan relief camp-rangona kate chakna nangaha ine uamang aganangaha.
Una agreba, nangchongmotgipa bosturangko man·a neng·aha, aro Garo Hills gimikon porikka seanirang aro salantini kamrang dontongatako man·aha ineba uamang aganangaha.
Bilchi-jakchi sokjachina manderangko mol·mole, mande ra·grikao aro tom·tomao janggi tangna Isolo bi·chinaba mondolini dilgiparangna didianiko on·e, namedake agangrikanirangchi, aro niamko ja·rike ja·ku de·anirangchi kajia-golmal ong·anirangko namatna nanga ineba uamang parakataha.
Garo Hills-o tom·tomaniko ra·bapilna bil ama dipet krengchinaba bishop-rang ku·pattianiko on·angaha, aro “Tom·tomani Raja” an·chingni A·chik a·songo aro a·gilsako pangnan tom·tomaniko ra·bachina ineba bi·aniko dakangaha.
