Shillong, Oct 14: Sukrobar salo, Meghalaya a·dokni Chief Minister Conrad K Sangma, a·dokni Arts & Culture Minister Sanbor Shullai-ni dongpaanio, salgnina ong·atenggipa Tri Hills Ensemble-ko do·ga oe on·angaha aro ia program-ko a·bachengatanio Arts & Culture-ni Commissioner Frederick Roy Kharkongor, Arts & Culture-ni Director SK Marak aro dingtang dingtang officer-rangba dongpae bak ra·angaha.
The festival showcases our rich tribal heritage, our unique arts and crafts, giving those visiting a memorable experience through music, food, dance and theatre.
Great to see the representation of our beautiful culture in full display at the festival. pic.twitter.com/CetIsdtuQ7
— Conrad Sangma (@SangmaConrad) October 14, 2022
Ia program-ko do·ga oe on·angani somoio a·dokni Chief Minister, jinmana aganprakangengon, ia bilsiara India a·songni jakgitelaniko man·aoni bilsi 75 gapaniko aro Meghalaya a·dokni bilsi 50 gapanikoba maniani bilsi ong·engani gimin namen dingtangmanchagipa ong·enga aro ia salgnina ong·atenggipa program-chi jatni daka rikanirangko mesokna namgipa chol ong·enga ine parakangaha.
A·dokni mande sakantinan aro mongsongbate chadamberangna uamangni jat aro ja·dilrangni gimin ma·siate on·na gita nangchongmota ine janapatengon, ia salgnina ong·atenggipa program-ara dingtang dingtang jatni daka rikanirangko manianisan ong·aigija chadamberangna uamangni ja·dilrangni gimin gisik ra·atani somoiba ong·enga ine Chief Minister parakataha.
Ia salni bako a·dokni damdok songrangna a·dok sorkari, dingtangmancha tangka paisani gita dakchakanirangko on·enga ine parakatengon, ia songrang jekai an·tangtangni namgipa kamrangko mikkangchiba ka·angkuna man·gen, uandake sorkari ia dakchakaniko on·enga aro bilsiantian iandakgipa boksisko sorkari, dingtang dingtang songrangko didina on·enga ine Sangma talate on·angaha.
Ia salo, ia Development of Arts & Crafts Award-rangko man·gipa damdok songranga East Khasi Hills a·jani Mawryngkhang, West Jaintia Hills-ni Larnai, Ri Bhoi a·jani Pahambir, East Khasi Hills-ni Tangmang, Eastern West Khasi Hills-ni Mairang aro West Garo Hills a·jani Amindagre song ong·a.
Iana skang a·dokni Chief Minister, dingtangmancha a·dokni sakgittam matgrikrang, chong·motan U Tirot Sing, U Kiang Nangbah aro Pa Togan Nengminjani mangkrongrangkoba oprake on·angaha.
A tribute fit for Heroes!
Unveiled the statues of U Tirot Sing, U Kiang Nangbah & Pa Togan Sangma at U Soso Tham Auditorium, Shillong.
A befitting tribute to our Freedom Fighters as we celebrate 50 years of our Statehood@PMOIndia @kishanreddybjp @MundaArjun pic.twitter.com/qQHTQcJOiM
— Conrad Sangma (@SangmaConrad) October 14, 2022
Ia Tri Hills Ensemble program-ara, Khasi, Jaintia aro Garo Hills-ni daka rikani, cha·a ringani, wata chengani, sika koani, git ring·ani, chrok mesaani aro dakmesokanirangko mesokna ong·atenggipa program ong·engachim.