Agartala, Aug 25: Assembly election-rang ong•na jadokmangsan dngaiahanina Tripura a•dokni BJP dolni kamrangko ka•soanio Tripura-ni Chief Minister Manik Saha aro uni deputy baksa Assam-ni Chief Minister aro central-oni dilgiparang apsan tom•e chanchirimaniko Guwahati songjinmano budbar salo dakangaha.
Tripura BJP dolni President Saha, Deputy Chief Minister Jishnu Dev Varma aro Assam Chief Minister Himanta Biswa Sarma baksa dolni National General Secretary B.L Santosh, re•baenggipa bilsini February jao ong•nasienggipa assembly election-na tarisamsoani bidingo Guwahati-o chanchirimangaha.
Kontabrimangna chanchirimanio gipin political dolrang baksa bakrime sorkariko rikpiltaiani bidingoba nipiltaianirangko dakangaha maina ia chango uamang Indigenous People’s Front of Tripura (IPFT) baksa melie sorkariko chalaienga.
BJP dolni National Vice-President Baijayant Jay Panda aro Tripura-o central observer ong•enggipa Fanindra Nath Sharma-ba tom•nio bak ra•paaha.
BJP dolni National President J.P Nadda aro Rashtriya Swayamsevak Sangh-ni Chief Mohan Bhagwat re•baenggipa antio a•dokona wenanganiko dingtangmancha dakangnasienga.
Indake ong•engon, Tripura-ni Trinamool Congress (TMC), doltangni President Subal Bhowmik-ko bilni biaptangoniko budbar salo ra•galskaaha. Doloniko koborrangko man•soani gitade Bhowmik, jean skangode BJP dolo kamrangko ka•achim, da•o re•baenggipa sal somoirango BJP dolni dal•batgipa dilgipani a•dokona wenbaanio BJP dolo nappiltainasianiko knasoaga.
Bhowmik, Congress dolni gitcham MLA ong•achim, jean West Bengal Chief Minister, Mamata Banerjee-ni ge•etanio Tripura a•dokni TMC dolni President-na seokako man•aha.
2020 bilsio Congress dolna bakrimaniko gnigipa changna on•piltaina skang Bhowmik, adita bilsirangna Bharatiya Janata Party-na kam ka•gipa ong•achim.
Unikoa tribal manderangoni dal•batgipa dilgipa Hangsha Kumar Tripura mongolbar salo Tipraha Indigenous Progressive Regional Alliance-na bakrimaniko on•anichi Tripura a•doko BJP dolna bilgrianirangko ra•baani ong•aha.
BJP dolna bakrimaniko on•enggipa IPFT dol baksa melie gimik sak 6,500 tribal manderang Hangsha Kumar baksa northern Tripura-ni Manikpur-o public rally ong•atgipao damsan TIPRA dolna bakrimaniko on•angaha.
