Agartala, Nov 30: Tripura a•dokni Sepahijala a•jao BJP dolni chadrapanichi, MLA Bhanu Lal Saha-ko man•chape CPIM dolna kamko ka•enggipa sak 15-na baten manderang saknaanirangko man•na aro saksa siaha.

Chadrapako man•gipa MLA Bhanu Lal Saha-ni kobor ra•timgiparangna parakatani gitade, Sepahijala a•jani Charilam-o donggipa party office mikkango CPIM dolni tom•aniko ong•atna permission-ko ra•ahachim indiba uamangni ua biapo tom•engmiting somoio BJP-ni manderang, uamangko boma aro ro•ongrangchi goe chadrapaha.

BJP-na kamko ka•enggipa manderangni chadrapanio Saha, uni gingting aro skoo mata bu•anirangko man•aha ineba u•iataha.

“BJP-ni manderang chingko so•otna miksongesa boma aro ro•ongrangko goe chadrapaha. Ja•mano chinga ATM-o nape katoba uamang chingko chadrapkuaha indiba angni PG-ni a•selsa anga jokaha,” ine hospital-o sanna bananiko ra•engmiting somoio MLA Saha aganaha.

BJP-na kamko ka•enggipa manderangni iandake chadrapani ja•man, CPIM-ni manderangba uamangko chadrapskaaha aro ja•mano adita so•sojengjeng ong•aniko nikna man•angaha ineba kobor on•aha.

Ja•mano obostarang namjabatroroangjana gita ia biapo police aro CRPF dolrangko sorkari donataha.