Agartala, Feb 28: Mija Sukrobar walo Dhalai district-ni Ambasa minggipa songo saksa trak gari salgipako adita sak denggurang bilongbee doke-sate donangaha. Ia ong·a obostara walni 8 oni 8:30 bajimangni gisepo ong·aha ine koborko man·soaha.
Doka-sata man·gipa mandeara Teliamura songoni saksa bilsi 54 ong·gipa Pradip Debnath minggipa ong·achim jean unomiting Assam-chini re·baengmitingo ia obostako chagrongaha aro ia mandeoniko gong hajal-sotbri tangkakoba denggurang re·seke katangaha, ine ja·pangoniko koborko man·soaha
Iani bidingo police-ni u·iatani gita, ua ong·anga obostara Ambasa-ni St. Arnold School samba jolo ong·aha. Ra·seke ra·giparang unomiting Bolero gario re·bae bostu gate salenggipa trakko dongdipateming Pradip-ko ning·oniko salongkataha aro joljol uko dokna-satna a·bachengaha. Ua trako dongpagipa sakgipin mande unomiting kate jokangna gita cholko man·aha.
Pradip-ni chrikako knae ua joloni manderang ua biapona re·bae nietokaha jeon Pradip Debnath-ni bilongbee saknae a·ao ga·ake dongenganiko niketokaha, jeni ja·man joljolan ua jolni manderang uko sambajol District hospital-ona ra·angahachim indiba rasong gribee walni 10 bajimango ua sina-sitengtoe janggi galaha.
Indake ong·engon, ong·anga obostachi ua biapo adita jajrengchipchipanirangko ong·ataha. Iani gisepon, dosko dake katanggipa denggurangko uamang sandiatenga ine police koborna u·iataha.
