Shillong, Oct 31: Damsite aro Umiam dolongni gisepo nangana bate bostu salruraenggipa truck garirangoniko tangka dabie ra·ani gimin Sombar attamchibara East Khasi Hills a·jani police-rang, Hynniewtrep National Youth Front (HNYF)-ni president Bless Dkhar-ko rim·aha.
Damsite aro Umiam dolong gita niamna bate bostu salruraenggipa truck garirangoniko HNYF-ni president, truck bolprako gong 1500/- ka·e dabie ra·aha ine matnangataha.
![](https://hubnetwork.in/wp-content/uploads/2023/10/WhatsApp-Image-2023-10-31-at-10.13.40-AM-1024x1024.jpeg)
Iani bidingo talataniko on·angengon, HNYF-ni president Bless Dkhar-ko Laitumkhrah Police Station-ni sipairang, Sombar attamchibara Pohkseh joloniko rim·aha ine East Khasi Hills a·jani SP (City) Vivek Syiem parakataha.
Syiem-ni u·iatani gitade, bostu salgipa truck garirangoniko tangka dabiengmitingo HNYF-ni president Bless Dkhar-ni ku·rangko chipe ra·enba watpripraatani ja·man Laitumkhrah Police Station-ni sipairang, uni kosako mokordomako ka·e, Sombar attamchibara uko rim·na man·aha.
![](https://hubnetwork.in/wp-content/uploads/2023/10/WhatsApp-Image-2023-10-29-at-10.36.53-AM-1024x683.jpeg)
Umiam dolong gita metric ton 10-na bate bostu salgipa garirangko re·na on·jachina 2022 bilsini March jaon Meghalaya High Court, district official-rangna ge·etaniko on·ahachim ine nikna man·a.
Iakoba poraie nina man·gen: MITTELPILANI | Lt. Santosh R. Marak
Watch