Tura, May 8: Meghalaya Board of School Education (MBOSE)-ni ong•atgipa, Higher Secondary School Leaving Certificate (HSSLC)-ni Commerce porikkao top-10-ni gittamgipa gadango chu•sokgipa ong•anina, Aditya Prasad-ko, Tura Don Bosco College Higher Secondary Section-ni gita mitelpilskaaniko dakangaha.
Ia bilsini HSSLC porikka seanio, Garo Hills a•ja gimikoni Top-10 list-o Aditya Prasad mangmangsan bimung nakatpaaha.
Prasad, uni ra•gipa mingbri subject-rango mark-rangko name man•aha, ua Mathematics-o 98, Economic-o 92, Business Studies-o 96 aro Accountancy 97 mark-rangko man•enba chu•gimik 458 mark-rangko man•aha. Ua mikkangchi B.com poraia baksana CA course-kona ra•na miksongenga aro ia chu•sokaniko ua salanti gisiko nang•e an•tangko on•kange salanti konta 2 prakna poraianichi chu•sokna man•aha ine aganangaha.
An•tangni katchaaniko parakengon, Prasad uni class-ni teacher, tuition teacher aro ma•a pako uni poraianirango dakchakahanina mitelpilangenba, ia chu•sokaniko man•anio uni tuition teacher-an una dalbatgipa dakchakani ong•aha ineba ua agandapangkuaha.
Prasad-ni chu•sokgipa ong•anina, Tura Don Bosco Higher Secondary Section-ni Principal Fr (Dr) Jogesh B Sangma, gipin chatro chatrirangna half-day holiday ine parakataha.
Ia bilsio, college-o science aro commerce-oba pass ka•ani percent-rang namen nambataha ine nikna gita man•aha. Science porikkao pass ka•giparang re•anggipa bilsio 96.15 % -san ong•aiachim indake ia bilsio 98.33% ona tang•dobataha. Uan apsandake, Commerce porikkao re•anggipa bilsio pass ka•giparang 82.6 % sanchim, indiba ia bilsio 91.5 % ona tang•doaha.
Science porikka seanio pass ka•giparang re•anggipa bilsina bate namen tang•dobataha, ia bilsio sak 30 chatro chatrirang mathematics-o letter mark-rangko man•e pass ka•anirangko nikna gita man•aha.
12th HSSLC Science 2024:
Total Appeared : 120
Total passed : 118
Pass percentage : 98.33%
1st Division : 70
2nd Division: 48
12th HSSLC Commerce 2024:
Total Appeared : 106
Total passed : 97
Pass percentage : 91.5%
1st Division: 36
2nd Division: 61
Na·simang ia video-koba nina man·gen:
Na·simang iakoba poraina man·gen: HSSLC-ni Science porikkao Shillong-ni Laban Bengali Boy’s Hr Sec School aro Commerce porikkao St Mary’s Hr Sec School skanggipa biapko man•e chu•soka
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter-twitter.com/nemediahub
Youtube channel- www.youtube.com/@NortheastMediaHub2020
