Tura, Apr 14: Re•anggipa 2023 bilsini Meghalaya Assembly election-o Congress dolna bate Trinamool Congress (TMC) Garo Hills-o vote-rangko bang•bate man•ahani gimin ia chang Lok Sabha election-o TMC-nan cholrang nambatenga ine TMC-ni candidate Zenith M Sangma a•kangataha.
Tura Lok Sabha constituency-o TMC-ni candidate Zenith Sangma, National People’s Party (NPP)-ni Agatha K Sangma, Congress dolni Saleng A Sangma aro Independent candidate Labenn Ch Marak baksa susagrikengachim ine nikna man•a.
North Garo Hills a•jani Resubelpara aro Mendipathar jolrango TMC-ni tom•bimonganirangko ong•atanio jinmana aganprakangengon, “Re•anggipa bilsini Assembly election-o Congress dol, 65,000 vote-mangmangkosan Garo Hills-o man•aiaha indiba TMC dolde laksa hajal sotskubonga vote-rangko man•aha. Indide Garo Hills-o NPP baksa susana sawa bilakbatenga?” ine Sangma sing•doangaha.
Sangma-ni aganani gitade, Tura Lok Sabha seat-o je dolan lakgni hajalsotbonga vote-rangko man•genchim, uan Tura seat-ko chegipa ong•gen aro Tura seat-ko chena gita TMC-nan cholrang nambatenga.
INDIA bloc-o bakrimgipa dolrang ong•genchimoba, Meghalaya a•doko seat sualgrikna manchianiko ra•chakjahani gimin ua Congress dolkoba raken jegalataha.
“Tura-ode TMC-an bilakbatani gimin chinga Tura seat-o susae, Shillong-ko Congress-na on•skana miksongachim. Ma•mongni dilgiparang chanchikuengmiting somoion Meghalaya a•doko Congress dol, Saleng Sangma-ko Tura Lok seat-na candidate dake seokenba parakatskaaha. Meghalaya a•doko Congress dol NPP-ni ge•etani gitasa dakenga,” ine Sangma matnangataha.
Ia chang Lok Sabha election-o susagija NPP-na chakskana tik ka•ahani gimin Garo Hills-o BJP-ni membor-rang bang•batan TMC-na pu•onskagen ineba Sangma a•kangataha.
TMC candidate-ni aganani gitade, Meghalaya a•doko BJP-ni membor aro dilgiparangko NPP-ni candidate-rangna chakskachina ma•mongni dilgiparang ge•etaniko on•ahaoba BJP-ni pilak membor-rangde NPP-ni candidate-rangna pu•onna gita siktokjaengachim.
“Re•anggipa bilsini Assembly election-o BJP, 90,000 vote-rangko Garo Hills-o man•ahachim aro iani giminsa Garo Hills-o BJP-ni worker-rang bang•batan, NPP-na chakskana manchianiko jegaltokenga. BJP-na pu•ongiparang bang•batan dilgiparangni ge•etaniko manijawa aro TMC-onasa re•batokskaengaha,” ine Sangma aganaha.
Na·simang ia video-koba nina man·gen:
Na·simang iakoba poraina man·gen: So•so jengjeng ong•engoba, Iran warachakgen ine mikrakata
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter-twitter.com/nemediahub
Youtube channel- www.youtube.com/@NortheastMediaHub2020
