Agartala, Nov 11: Tripura a·doko ong·nasienggipa Municipal election-o TMC doloni susana am·enggipa candidate-ko saljrakjrakon ma·sina man·gijagipa manderangni chadrapani bidingo Trinamool Congress-ni dilgiparang, Bristibar salo a·jani skotong Agartala-ni Tripura police headquarter mikkango asonge jingjengatangaha.
TMC-ni matnangatani gitade, uamangni candidate jean saksa ukilni kamko ka·gipa ong·a aro re·baenggipa November 22 tariko ong·nasienggipa Agartala Municipal Corporation Election-o Ward 14-ni gita susana am·enggipa Ma Poushali Deb-ko Ranjitnagar jolo dolsa denggu dakgiparang chadrapaha jeni giminan uamang Tripura a·doko bil-sasonko jako ra·enggipa BJP sorkariko jaksi otangaha.
“BJP-ni manderang sak 20 oni sak 25-rangni gita Ranjitnagar High School mikkango saljrakjrakon uko chadrapaha aro unbaksa re·chapgipa gipinrangkoba doka-sataha. Ia mamlao police-ni ja·ku de·ataniko chinga dabia,” ine Tripura-ni TMC convenor, Subal Bhowmik Bristibar salo aganangaha.
Party-na kam ka·giparangko chadrapani gimin dos dakgiparangko rim·china police-o dabie TMC dolni adita sak dilgiparang, ong·nasienggipa eleksinna party-ni in-charge ong·enggipa Ma Sushmita Dev-ni dilanichi Bristibar salo Tripura Police station-ko champengate jinma asonge jingjengatangaha.
“Tripura-o campaign-ko ka·na tik ka·chengaonin BJP dolni manderang chingni dilgiparangko changni-chang chadrapenga aro uamangko gisikni gitaba saknaatenga indioba da·ona kingkingan darang saksakoba Tripura police rim·a dongkuja. Iani chu·gimik sakkirangba chingo gnang, indiba police ia mamlarango jrip-mittipsa,” ine TMC dolni palo Upper House-ni member ong·enggipa Ma Dev parakataha.
Ia mamlani bidingo Ma Dev, lekka seachi Supreme Court-o mol·molaniko dakangaha, indake sakgipin RTI activist-oni TMC-ni agantimgipa ong·skaenggipa Pa Saket Gokhale, a·doko politicalni gita kajia-golmalko ong·atenganina National Human Rights Commission (NRHC)-o dakchakaniko am·angskaaha.
Janapna gita, giproroenggipa sabisi sokbaani a·sel ja·manchakbee ia November jani 22 tariko Tripura a·doko dam 20 urban local bodies (ULB)na eleksinrangko ong·atna gita manchisoaha, je eleksinnan a·doko sasonni bilko jakkepenggipa BJP dol susagijan dam snirangode cheaha.
Warachakgipa dolrang jekai TMC, CPI-M aro Tipra Motha –iamangni matnangani gitade, a·doko sasonni bilko jako ra·enggipa dolni rakkigipa manderangni ka·mikkenatani, kajia-golmalko ong·atani a·selan uamangni bang·bata candidate-rangoni mitamrang susatokjaengaha ba mitamara nomination-rangko ra·piltokaha.
TIPRA Motha-ko bikotdilchenggipa padot aro Tripura-ni raja ma·chongoni Pa Pradyot Kishore Debbarman, ong·nasienggipa eleksino uamang Santirbazar Nagar Panchayat-o gimik dambonga seat-rango susaani ong·achim, indiba BJP-ni manderang uamangni nomination lekkarangko on·aniko champengaha ine matnange aganangaha.
