Shillong, May 5: Ri Bhoi a•jani Umsning Police Outpost-ko Police Station-ona ra•doatchina didie, Hynniewtrep Achik National Movement (HANM) Ri Bhoi unit, Meghalaya a•dokni Home Minister Lahkmen Rymbui-na sedoataha.

Iani bidingo kobor ra•timgiparangna talataniko on•angengon, Umsning police outpost-ko Police Station-ona ra•doatna gita kamrangko niatna Home Minister ku•rachakaniko on•ataha ine HANM Ri Bhoi Unit-ni president Pateng Mersing parakataha.

Mersing-ni parakatani gitade, somoini kri Umsning songba da•o Ri Bhoi a•jao dal•batstanggipa biaprangoni damsa ong•ahani gimin police outpost-ko police station-ni gadangona ra•doatna nangengahachim.

Umsning police outpost-ni ning•o dam 50-mangni gita songrang donge, manderangna chel•chakanirangko on•anio kam ka•gipa sipairang chu•ongjaenga, uni gimin ia outpost-ko police station-ona ra•doatna nangengaha ineba HANM Ri Bhoi unit-ni president parakataha.