Shillong, May 5: Bristibar salo, North East Food Show (NEFS) 2022-ko Meghalaya a•dokni Chief Minister Conrad K Sangma, do•ga oe on•angaha aro ia program-ko do•ga oe on•angani somoio Sikkim a•dokni Chief Minister Prem Singh Tamang Golay aro Meghalaya a•dokni Agriculture & Farmers Welfare Minister Banteidor Lyngdoh-ba dongpae bak ra•angaha.
Ia NEFS 2022-ko do•ga oe on•angani somoio Meghalaya a•dokni Chief Minister Conrad K Sangma, jinmana aganprakengon, ia dal•begipa Food Show program-ko gnigipa changna Paris songjinmaoni SIAL baksa nangrime Meghalaya a•doko sokachakna man•engani gimin an•tangni kusi ong•aniko parakangenba, ia Food Show-ko ong•atna chanchichengani somoiode ia program-na koros ka•anirangko hisape chu•sokgipa ong•jana gita nikachim ine parakangaha.
Iandake dal•gipa program-rangko ong•atanio bilsisa ba bilsignini gisepode biteko man•gen ine ka•dongna man•jawa ine janapatengon, ua an•tangan niksamsoani gnangsa iako ong•atna manchiahani gimin dingtang dingtang ra•bianirang donggenchimoba ia program-ko ong•atna man•aha ine Sangma parakataha.
2019 bilsio skanggipa Mega Food Show-ko ong•atani ja•man a•dokni mitam bading chiwalgiparang aro game ge•e cha•gipa manderang, a•gilsakni dingtang dingtang biaprangona an•tangtangni bosturangko watatna man•aha ine talataniko on•angengon, game ge•e cha•giparangna aro bading chiwalgiparangna iandakgipa cholrangko on•aniara sorkarini daitoan ong•a ine Chief Minister aganaha.
Ia North East Food Show-ara dingtang dingtang dolrangko apsan tom•chimongate bostuni gamchataniko bariatani chol ong•enga ineba ua aganaha.
Ia NEFS programara cha•anirangko mesokgipa program-san ong•aija indiba bading chiwalgiparangko, game ge•e cha•giparangko, cooperative society-rangko aro Self Help Group-rangko tang•dona on•enggipa chol gitaba ong•enga ineba Sangma aganaha.
International market-ni sandienggipa bosturangko Meghalaya a•dokmangmangchide on•na man•jawa ine nikesa ia program-ko North East Show dakataha ineba Chief Minister parakataha.
Chief Minister-ni parakatani gitade, ia program-ko South East Asia-ni a•songrangonaba sokatna sorkari miksongenga.
Salgro salaram a•dokrangba Vietnam a•song gita ong•na man•gen ine janapatengon, Vietnam sorkari, Vietnam a•song aro Vietnam a•songo songdongenggipa manderang an•tangtangan rakbee kamko ka•anichi ia a•songko bading chiwalgipa a•song ong•atna man•aha ine Sangma, mittelpile aganangaha.
Ia North East Food Show-ko bilsiantian ong•atna gita a•dok sorkari jotton ka•enga ineba Chief Minister parakataha.
