Tura, Feb 15: Union Home Minister Amit Shah, Bristibar attamo Tura-ona re•baenba, Don Bosco School kal•chakramo ong•atenggipa BJP-ni tom•bimonganio jinmana aganprakanggen ine BJP-ni dilgipa aro South Tura constituency-ni BJP candidate Bernard N Marak parakataha.
Sorkariko rikna man•genchimode mai dakgipa namroro silroroanirangko BJP, Meghalaya a•dokna ra•bana siengachim, uarangni gimin Amit Shah jinmana talate on•anggen ineba Marak parakataha.
Ma•mong sorkarini tangka paisarangchi dakchake on•atgipa project-rangko NPP-chi dilgipa sorkari a•kange ra•na jotton ka•aha ineba ua matnangataha.
Ma•mong sorkarini project-rangna a•songni Prime Minister Narendra Modi-sa mittelpilaniko man•na nangachim indiba a•dok sorkarisa ia kamrangna rasongko a•kanggopskaenga ineba ua aganaha.
