Shillong, Feb 15: Meghalaya a•doko Inner Line Permit (ILP)-ko ra•gataniara tourism-na nangchakeaniko ra•bagen ine Budbar salo, Bharatiya Janata Party (BJP)-ni national secretary Rituraj Sinha parakataha.
BJP-ni election manifesto-o ILP-ni bidingo mamingkoba janapjahani gimin sing•anina ua ia kattarangko aganchakaha.
“Meghalaya a•doko ILP-ni gimin manderangni chanchianiara dingtang dingtang ong•engani gimin maiba a•selde dongenggen ine chinga bebera•a, uni gimin ian pilak dolrang baksa agangrikchengna nangenggipa kamsa ong•enga. Meghalaya a•dokna namroro silroroaniko ra•baanio Tourism-an mongsonggipa bak ong•enga indiba a•doko ILP-ko ra•gatgenchimode a•paloni re•baenggipa manderangna rakgipa niamrang dongani gimin ian a•dokni tourism-nade nambrea ong•jaenga,” ine Sinha, BJP-ni election manifesto-ko oprake on•angani ja•man kobor ra•timgiparangna aganaha.
Election-ni ja•man ILP-ni bidingo BJP-ni dilgiparang, dingtang dingtang dolrang baksa agangrikgen aro manderangni nangnikanirangko ra•ani ja•man nanga gita ja•kurangko de•gen ineba BJP-ni national secretary parakataha.
A•doko ILP-ko ra•gatna gita ma•mong sorkariko didina 2019 bilsion Meghalaya Legislative Assembly-o resolution-ko pass ka•manahachim aro resolution-ko pass ka•gipa sak 60 MLA-rangoni BJP-ni MLA sakgni, chong•motan Sanbor Shullai aro AL Hek-ba bak ong•paachim ine nikna man•a.
