Guwahati, June 19: Ong·telaigipa samtangtangoniko namgipa, chemical grigipa bosturangchi similatna nongani ba perfumeko tarina man·genchimode, mandeni dakgimin, be·enna namgijaniko ra·bagipa bosturangoniko tarigipa perfumerangko maina jakkalgen ine chanchie, Univesity of Science and Technology (USTM), Meghalaya-ni botanyko poraienggipa chatri saksa India-ni Salgro-Salaramni rokomari sam-bolrang aro uandakgiparangko organic perfumeko tariaha.
M Sc. 4th Semester-o Botany-ko poraienggipa Archi Phukan, uni skigipa Dr. Mautushi Das, USTM-ni Associate Professorni dilanichi, biaptango man·gipa kakjini rokomrang jekai kaji nemu aro robab tenga baksana, balgitorang, bibalrang aro dingtang dingtang bosturangko ia perfumeko tariaha.
“Biaptango man·gipa kakjini rokomrangko perfume tario maikai ong·achim, chinga u·ina skaha. Biterangoniko tarigipa similatna nonganirangko antidamrango bang·e nikna man·a, iarangko mongsongbate da·ororni chadamberang jakkala. Chinga ia perfumeko tarianio chu·gimik organic bosturarako jakkalaha – chemicalrang aro synthetic bosturang mingsaba dongja,” ine Dr. Das talate on·aha.
Ia organic perfumerangko tarinio sam-bolrangoniko jetgimin to-rangko jakkale taria aro antidamrango man·gipa perfumeranggita on·chapanirang dongja. Uandake ia organic perfumerang be·enna nambata baksana, an·chingni dongram a·gilsaknaba nisianiko ra·baja.
Phukan-ni perfume-rangko ong·telaigipa samtangtangni bibarang, mesengchip kakjirangni bibarang aro bibalrangni similding bibarangko brine tarianichi Assam-ni tangsekgilgil, mikka-chi tangchaatgipa biaprangko gisik ra·ataniko on·a. Tariani bosturangko burungrangoniko aro a·doktangni baganrangoniko ra·gimin ong·a aro ianoni bang·a bosturangan Assamese dakbewalrango jakkalgiparangba ong·a.
“Iara perfume-san ong·aija, indiba Assamni rokomari sam-bol bang·aniko aro jatni man·rikrikgipa gamko mande ra·e manianiba ong·a,” ine Dr. Das agandapaha.
Ia project-ara chubata gadango poraie sandianirangko dakani aro songo-noko donggipa manderang baksa nangrime kam ka·anikoba mesoka. Ia perfumeko tariani to ba essential oil-rangko samtangtangko nisiatgija, aro songni nokni manderangni janggi tanganiko dakchakaniko on·e – science, jatni dakbewal aro songsarna namgniko nangdimata.
Ia tarigimin perfume-ko badingna gisik nangenggipa companyrang baksa USTM da·o agangrikanirangko dakenga aro mikkangchi iako dal·dapatangna aro bang·bate tariangkuna ka·dongenga.
Na·simang ia video-koba nina man·gen:
Na·simang iakoba poraina man·gen: Chang 4-gipa Inter Mahari Football Tournament-ko July-o a·bachengatgen
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Instagram- www.instagram.com/ne_media_hub
